XABIER Salillas hernaniarrak atzo hasi zuen erronka berria, 48 orduz jarraian zinta gainean martxa eginez oinutsik. Hala ere bihar jakingo da 48 edo 49 ordu egingo dituen. «Asteburu berezian gaude, ordu aldaketa egingo da, eta ostiraleko 18:00etatik igandera arteko 18:00ak arte 49 ordu daude» dio Salillasek. Eta ordu hori izango omen da gogorrena dio korrikalariak.
Orain bi urteko ideia batetik sortu da erronka. Bartzelonan egin behar zen, baina hura ez zen irten eta pasa den urtean Juleneren alde 24 ordu jarraian ibili eta gero, orain Pausokaren alde egingo du ahalegina bikoiztuz. Atzo hasi eta badaramatza ordu batzuk Salillasek eta aurretik Kronikari azaldu zizkion xehetasunak. «Astakeria dira 48 ordu eta bi urte daramatzat prestatzen. Oinutsik entrenatzen errepidean eta pistan baba egin eta gogortzeko».
Hala ere lanik haundiena psikologoarekin egin du. «Prestakuntza gehiena psikologoarekin egin dut. Fisikoa badut eta 12-13 kilo jeitsi ditut pasa den urtetik. Eta landu behar dena batez ere psikologikoa da, egun batean zortzi ordu elkarrekin sartu ginen garaje batean. Urte bete daramat lanean quiromasajistarekin, nire gainean egongo dira erronkak iraun bitartean. Bartzelonatik nire datuak denbora errealean edukiko dituzte» Hori bai ez zaio burutik ere pasatzen erronka bertan behera uztea. «Hori ez da kalkuluetan sartzen. Entrenamenduetan mugak bilatu eta gainditu ditugu arazoren bat sortzen bada aurre egiteko. Gaua oso gogorra egiten da, baita ura edan beharra. Al bada urik ez dut edango eta estabilizatu behar baldin bazait sagarrak jango ditut».
Honelako erronka baterako indarra nondik ateratzen duen galdetuta ez du zalantzarik ere egiten. «Laguntzeko egiten dut. Eta beraiek ematen didate indarra. Nik ez dut dirurik eta eskaini dezakedana nire hankak dira. Astigarragan Juleneren irudiak eskerrik asko Xabiren animoekin da nre bitamina. Irudi horrek betetzen nau, jakiteak besteei laguntzen ari naizela. Nire bihotzeko taupadak jarraitzen duten bitartean behar duenari lagunduko diot».
Sentimenduak azaleratzen direla dio Xabier Salillasek eta momentu horretan dena uzteko ere gogoa sartuko zaiola adierazten du. «Momentu latzak pasatzen dira. Horregatik jendea animatuko nuke etortzera eta laguntzera nire jardunean. Hiru zinta ipiniko ditugu nirekin batera ibiltzeko. Batelerak traineruko Alazne eta Laura egongo dira, baita nire lagun Toni kataluniarra ere. Europako ipar martxako txapelduna da Toni. Ezustekoren bat ere egongo da eta pertsonaia ezagun bat ere egongo da».
Eta amaitu eta gero ez uste astelehenean jai hartu duenik. «Hurrengo egunean berriz ere andamiora igoko naiz Alegin. Igeltsero lanetan nabil tabernako lana utzi eta gero. Asteburuetan gutxinez jai dut».
Etekinekin familiak lagundu eta umeen bizi kalitatea hobetu
Atzo hasi ziren familia guztientzako ekitaldiak eta gaur jarraituko dute Salillasek zinta gainean jarraitzen duen bitartean.
PAUSOKA Elkarteak, behar bereziak dituzten haurren gurasoek sortutako elkarte gipuzkoarrak, haur horien garapenean behar-beharrezkoak diren errehabilitazio-tratamendu kognitiboak eta fisiko desberdinak sustatu, babestu eta burutzea du helburu.
Horretarako, berezko errehabilitazio-zentro bat izatea ezinbestekoa dute eta, gaur egun, helburu hori lortzeko hainbat ekintza gauzatzen ari dira. Atzotik eta bihar arte Atsegindegin astebukaera osoko ekitaldia antolatu dute helburu solidarioekin. Bertan Xabier Salillas korrikalari hernaniarrak, 48 orduetan zehar, gelditu gabe zinta baten gainean oinutsik dabil martxa eginez.
Esfortzu erraldoi honen inguruan ekintza desberdinak antolatu dira elkartea ezagutarazteko eta laguntzeko. Bertan puzgarriak, tonbola, jokoak, zumba… daude atzotik guztien artean ondo pasatzeko.
Bertan lortutako etekinekin hurrengo ekintzak bultzatu nahi dituzte: «Gizartean gure elkartea ezagutaraztea, gure behar berdinak dauzkaten familiak lagundu ahal izateko; behar bereziak dituzten umeen egoera hobetu, bizi kalitate hobea lortu ahal izateko; eta umeak babestu terapia desberdinen bidez».
Gaur, urriak 27
- 10:00: Denontzateko Ismarekin Crossfit saioa.
- 11:30: Umeentzako tailerrak eta jokoak
- 13:00: Pintxoak txosnan.
- 16:00: Eureca Dancekin dantza eta festa.
- 18:00: Puzgarriak.
- 22:00: DJ Festa.
Bihar, urriak 28
- 09:30: Txistulariak.
- 11:00: Umeentzako tailerrak.
- 12:00: Buru-arin eta erraldoien kalejira.
- 16:00: Txokolatada.
- 17:00: Zozketa berezia.
- 18:00: Xabier Salillasen ekintzaren amaiera.