Pio Barojaren Zalakain abenturazalea eleberria oinarri hartuta, Martin Zalakain ikuskizuna sortu du Juan Antonio Urbeltzek. Antzerkia eta dantza uztartzen ditu ikuskizunak; Harkaitz Canok sortu du gidoia, eta Ander Lipus aktorea jarri du On Pioren azalean.
Dantzarien artean, besteak beste, Astigar dantza taldeko gaztetxoak daude. Hainbat saio egin dituzte dagoeneko, eta gaur, Urretxun izango dira. Arratsaldeko 19:00etan hasita eskainiko dute ikuskizuna Ederrena pelotalekuan.
Beste hainbat talde, ere bai
Dantza, jolasa, musika eta abestien bidez, Martin txikiaren abenturetatik hasita, helduaroko bizipenetara garamazki ikuskizunak. Eta horretarako, Astigar dantza taldearen laguntzaz gain, beste hainbat taldeko kideak ere igoko dira oholtzara: Donostiako Argia, Añorgako Arkaitz, Debako Gure-Kai, Eibarko Kezka, Elgoibarko Haritz, Iruñeako Duguna, Biarritzeko Maritzuli eta Portugaleteko Elai-Alaiko dantzariak.
Bi saio, aurrerago
Andoainen izan ziren aurreko astean, Urretxun izango dira gaur, eta datozen asteetan, beste bi saio ere eskainiko dituzte: azaroaren 24ean Azpeitian izango dira eta abenduaren 1ean, Basaurin, iluntzeko 20:00etan.