Plan borobila antolatu du Astigarragako Gazte Asanbladak gaurko. Urtero jokatzen duten pala txapelketa mistoaren bueltan egingo dute, 16:00etan hasita izango dira partiduak, Txomiñenea frontoian. Partehartzaileei eskatu diete lehenago agertzeko, 15:45ak aldera.
Gazte afaria, gero
Txapelketan sortuko den giroa aprobetxatuko dute gazteek, ondoren, gazte afariarekin festa lehertzeko. Gaueko 21:30etan izango da hori, Zipotza elkartean. Aurretik, gainera, triki poteoarekin alaituko dituzte herriko kaleak, Zipotzatik bertatik abiatuta.
Afariaren ondoren, giroak jarraitu egingo du, eta horretarako, sorpresa ederra prestatu dute. Elektro Buiaka taldea eta Astigarragako Chimamanda arituko dira, herriko gazteak animatu eta dantzan jarri nahiean.