Datorren astearteko Plenoan, gaietako bat izango da 2019rako zergak eta tasak onartzea. Eta aurretik, atzo aurkeztu zuen Udal Gobernu Taldeak, prestatu duen proposamena: %1 igoko dira orokorrean, eta mantendu egingo dira batzuk.
«Irizpidea da, urtero pixka bat igotzea, gastuetan izaten ari den igoera konpentsatu ahal izateko. Gora egiten ari dira tarifak, soldatak eta KPIa. Eta arauek eskatzen dute, gastu eta sarrera arruntek orekatuta egon behar dutela, batak bestea kubritu behar duela. Oso garrantzitsuak dira zerga eta tasak, zerbitzu publikoak hortik finantziatzen direlako», azaldu zuen Isa Sanchez ogasun zinegotziak.
Bereziki, hiru gastutan izandako igoera nabarmendu zuen Sanchezek: «2015etik, Añarberen tarifetan %24,13ko igoera izan da; San Markosen tarifetan, bio-hondakinarena %92,01 igo da eta errefusarena %20; eta KPIa, azkenik, 2,2 puntu igo da, %5a suposatzen duena. Beraz, gastuak haunditzen diren bezala, tasak eta zergak ere igo ditugu, baina gutxiago».
Etxebizitza, ibilgailua, hondakinak edota ura, %1eko igoerarekin
2019rako, %1eko igoera orokor horren barruan daude, zerga eta tasa ohikoenak: IBIa, ibilgailuen zerga, hondakinen tasa, eta urarena. Igoera hori izango dute, baita ere, kiroldegiko abonoek, udalekuek, bide publikoen aprobetxamendu bereziak, auto-taxi lizentziek, hirigintzako lizentziek, su itzalketa eta herri babeserako zerbitzuek, hilerriko zerbitzuek...
Mantendu egingo direnen artean, ondokoak: feriako edo udaletxeko arkupeetako saltokiena («duela bi urte %25 jaitsi genuen eta apustua da mantentzea», azaldu zuen Sanchezek), Ereñotzuko frontoia erabiltzekoa, ikuskizunetarako sarrerak, Ekonomia Jardueren gaineko zerga edota obrena.
Eta igoera haundiago izango duen bakarra, industria guneetako hondakin bilketan errefusaren tasa da; %10 igoko da hori: «konturatu gara, poligonoetan oso gutxi birziklatzen dela. Hondakin mota ezberdin asko, errefusera botatzen dituzte nahastuta. Horregatik haunditu dugu errefusarena, dena horretara bota beharrean, bereizi ditzaten», azaldu zuen Luis Intxauspe alkateak.
Zerbitzu sozialei dagokienez, %20 jaitsiko da etxez etxeko laguntza zerbitzua, eta mantendu egingo dira gainerakoak: jangela soziala, eta etxebizitza eta aparkaleku sozial zein tutelatuak.
«Ez dira nahastu behar tasa eta zergak, eta gerakina»
Sanchezek argitu nahi izan zuen, ez direla nahastu behar tasa eta zergak, gerakinarekin: «sarrera arruntak dira gastu arruntak ordaintzeko, edozein etxetan bezala. Eta gerakina dira urte bukaerako aurrezkiak, baina legeak dio, zorra ordaintzeko erabili behar direla, edo zorrik ez badago, beste zerbaitetarako erabili. Baina ezin da pentsatu, gerakina dagoenez ez ditugula zergak eta tasak igo behar. Gastuak gora badijoaz, zerga eta tasak ere igo behar dira, orekatzeko».
Nabarmendu zuen, azkenik, dirulaguntza eta hobari sistema oso potentea daukala Hernanik, zerga eta tasetarako.