Saio berezia izango da, Hernaniko Musika Bandak gaur egingo duena. Ateak zabaldu, eta entsaio irekia egingo du, iluntzeko 20:00etan hasita, Milagrosako lokalean. Horrela, interesa duten herritarrek, zein Buruntzaldeako biztanleek, aukera izango du «barruko bizipenaz eta ikasketaz gozatzeko, musikariekin bat eginez».
Gainera, ordubete lehenago ere azaldu daitezke bertara, 19:00etatik aurrera, musikarien beroketa lanak zuzenean jarraitzeko, eta beraiengana gerturatzeko. Izan ere, ekimen honekin, «gertutasuna adierazteaz gain, gure esperientzia musikala partekatzeko aukera eskaini nahi dugu», diote.
Azaltzen direnek, nahi izanez gero, «harrera pertsonalizatu bat» izango dute: esate baterako, atrilean bertan eseri ahal izango dira musikariekin, partitura eta zuzendariaren aholkuak eta irizpide pedagogikoak jarraitzeko.
Musika ikasleentzat, bereziki
Saioa bereziki pentsatuta dago musika munduan murgiltzen hasi berri direnentzat (tresna ezberdinak ezagutu, eskuetan hartzeko aukera, probatzeko aukera...), zein murgiltze prozesuan nahiko aurreratuta daudenentzat (afinazio kontuak, esaldi musikalen ejekuzio zuzena, melodia nagusiak identifikatu eta errespetatu...).