Udal Liburutegian izango da Kattalin Miner idazle hernaniarra, gaur, «irakurle gisa izan duen eskarmentua erakusteko», azaldu dutenez. Izan ere, irakurketa partekatuak egitasmoaren aurkezpen saioa eskainiko du, iluntzeko 19:30etan. 16 urtetik gorakoentzat da.
Saio horretan, solasaldia egingo dute bertaratuek, Minerrek aukeratu dituen 10 liburuen inguruan. Horiei buruz, galderak egin ahal izango dituzte: zergatik titulu horiek, oroimen bereziren bat ekartzen ote dioten, hausnarketa esanguratsuren bat partekatu dezakeen beraiekin...
Hauek dira, berak aukeratu dituen liburuak: Bihotz handiegia (Eider Rodriguez), Hauts haietatik (Unai Villena), Itzulera (Martin Bidaur), Mari mutil handi baten bluesa (Leslie Feimberg), Middlesex (Eugenides Jeffrey), Ogi hutsa (Mohamed Xukri), Pasio hutsa (Annie Ernaux), Pentsamendu heterozuzena (Monique Wittig), Umeek gezurra esaten dutenetik (Uxue Apaolaza), eta Vernon Subutex (Virginie Despentes).
Liburu guztiak, eskuragarri
Hamar liburuak, liburutegian bertan egongo dira, atal berezi batean, azaroaren 30era arte. Eta maileguan hartzeko ere badago aukera.