Beste urte batez jarri dute martxan aurten, indarkeria sexista prebenitzeko, Beldur Barik programa, gazteei zuzendutakoa. Horretarako, ikusentzunezkoen lehiaketa antolatu dute, 12 eta 26 urte bitartekoentzat. Helburua da, bideoen bitartez erakustea, neska eta mutilek nola erantzuten duten desberdintasun egoeren aurrean, eta nola egiten dieten aurre indarkeria sexistaren adierazpenei, Beldur Barik jarrerarekin. Lehiaketan parte hartzeko, azaroaren 9ra arte dago epea, eta www.beldurbarik.eus webgunera bidali behar dira.
Lehiaketa propioa eta topaketa, Hernanin
Baina orokorraz gain, lehiaketa propioa antolatu dute Hernanin ere: orokorrean parte hartzen duten hernaniarren artean izango da, eta sari potoloak banatuko dituzte: 150 euroko saria, bi kategorietan (12-18 urte eta 18-26 urte).
Hernaniarren bideo guztiekin, emanaldia antolatu dute azaroaren 23an, 18:30etan Biterin. Bideoak ikusi, meriendatu, eta sari banaketa egingo dute bertan.
Horren aurretik, beste topaketa bat ere antolatu dute Hernanin. Larunbat honetan bertan izango da, 10:00etan hasita Biterin; eta bi tailer eskainiko dituzte: neskei bideratuta autodefentsa feminista tailerra, Izaro Auzmendirekin; eta mutilei zuzenduta, ligoteoa eta pornografia aztertzeko tailerra, Ibai Fresnedorekin.
Lehiaketa orokorreko sari banaketa eta topaketa, berriz, azaroaren 24an izango da; eta joateko, autobusa doan jarriko dute Hernanitik. Izena emateko: www.beldurbarik.eus.