HERNANIARRAK beti egon dira estuki lotuak Txantxillara. Urteetan herriko kanposantua zena futbol zelai bihurtu zen eta herritar askoren pozak eta tristurak bertan azaleratzen ziren astebururo. Ondoren auzo oso bat eraiki zen bertan eta gaur egun urtez urte pozak berreskuratu eta tristurak atzean uzten dituzte.
Seigarrenez ospatuko dituzte aurten, Txantxilla auzoko jaiak, Hernaniko auzoetako azkenekoak bihurtu direnak. Eta gaur hasiko dira, eta bihar larunbatean egun haundia ospatuko dute. Beste behin, beraz, Arimen Egunaren edo Gau beltzaren bueltan ospatuko dituzte, lehenago aipaturiko Hernaniko hilerri zaharra zegoen tokian, hain justu.
Txupinazoa, 20:00etan bota aurretik, puzgarriak jarriko dira haurren gozamenerako auzoko plazan eta denentzako pintxopotea antolatu da. Ondoren botako dute txupinazoa, eta ongietorri berezia egingo diote Arima Bihurriari, trikitilariek lagunduta.
Biharkoa da egun nagusia eta arimen kalejirak dantza estreinatuko du
Biharkoa izango da egun nagusia, eta krosarekin ekingo diote. Haurrena egingo dute hasteko, eta helduena ondoren, Santa Barbarako ermitara igo eta jaitsiz, 6,3 kilometro osatzeko.
Helmugara aurrena iristen denak bakarrik ez, ermitako kanpaia jotzen lehenengoak ere izango du saria gero. Izenematea zabalik dago, www.herrikrosa.eus webgunean, 5 euroan. Bihar bertan, 10:00ak baino lehen irteeran, 7 euro izango dira.
Sagardo dastaketa eta auzotarren bazkaria ere izango dira eguerdian. Plazan biltzen dira bizilagunak giro ezinhobean mahaiaren inguruan. Eta arratsaldean, arimen kalejirak hartuko du protagonismoa, beste behin.
Iluntzearekin batera aterako dira haur eta gaztetxoak, beltzez jantzita eta aurpegiak margotuta, dultzaineroen laguntzaz. Aurten, gainera, nobedade bat ere izango du kalejirak: dantza egingo dute arimek, doinu berezi bat oinarri hartuta, Irungo Agirretxe anaiei esker iritsi zaiena. Dantza lehenengo aldiz ikusteko aukera dute bihar herritarrek 19:00etatik aurrera
Doinu horrekin dantzatuz eta kalejiran, urte osoko giro txarrak, beldurrak, zalantzak eta kezkak uxatuko dizkiete arimek, bertaratuei, erratza eta maskuriak astinduz. Gauerdiarekin batera amaituko da festa.
TXANTXILLAKO JAIAK
Egitaraua
URRIAK 26, gaur
17:00-18:30, Puzgarriak, Txantxillako plazan.
18:00, Pintxopotea.
20:00, Jaien hasiera: txupinazoa eta Arima Bihurriaren etorrera, trikitilariek lagunduta.URRIAK 27, bihar
10:00, Diana, Hernani Musika Eskolako txistulariekin.
10:15, Haurren krosa.
10:30, VI. Txantxilla-Santa Barbara-Txantxilla Krosa.
11:00, Haur jolasak.
12:00, Sagardo dastaketa eta pintxoak.
14:30, Auzotarren bazkaria.
17:00, Toka txapelketa (lehenik haurrak eta ondoren helduak).
17:00, Pirata Garrapata haurrentzako ikuskizuna.
18:00, Txokolatada
19:00, Arimen kalejira, Hernaniko
dultzaina taldekoekin.
20:00, Pintxopotea, Matraka elektrotxarangak lagunduta.
23:45, Festen amaiera.