Ikasturteko martxa hartuta, bere egitasmo guztiak abian jarrita da Dobera Euskara Elkartea. Horrela, bihar eskainiko du Zinea Euskaraz! programaren hurrengo saioa, urrikoa, arratsaldeko 18:30etan Sandiusterrin: 80 egunean pelikula jarriko dute, Jon Garañok eta Jose Mari Goenagak zuzendutakoa. Sarreraren truke, borondatea eskatuko dute.
104 minututan, Axun eta Maiteren istorioa kontatzen du filmak. Lagun minak izan ziren gaztetan, eta 70 urterekin, ospitalean egingo dute topo berriro, 50 urte luzeren ondoren. Laster konturatuko dira, bien arteko kimika ez dela aldatu. Gustura arituko dira elkarrekin, Axun konturatu arte Maite lesbiana dela. Orduan, bere sentimenduak dudan jarriko ditu Axunek: zer jarraitu, burua ala bihotza?
Jauzi egiteko mila arrazoi, mintzapraktikarekin
Gure Artean Euskaraz mintzapraktika egitasmoa ere, dagoeneko jarri du martxan Doberak. Eta hori aurkezteko, Egin jauzi! kanpaina abiatu du, Topagunearekin batera. Astean behin elkartzen dira, euskaraz hitz egiteko ohitura dutenak eta mintzapraktika egin nahi dutenak, jauzi egiteko, helburu ezberdinekin: euskera hobetu, gehiago erabili, euskeraz bizi, normalizazioaren alde egin, inguru euskalduna sortu... Talde txikitan elkartzen dira, paseoan, kafetegian, parkean...
Parte hartzeko, nahikoa da euskeraz komunikatzeko gutxieneko maila izatea, eta astean ordubetez elkartzeko prest egotea. Doberan eman behar da izena: Larramendi 11 beheko bulegoan, 943 33 27 99, edo dobera@dobera.eus. Gainera, nabarmendu dute laguntzaile beharra dagoela, saio horietan aritzeko boluntarioak, goizez edo arratsaldez. Eta nabarmendu dute, EHUko ikasleek kredituak jasoko dituztela, hori egiteagatik: 25 ordurengatik, kreditu aske bat.
Loteria ere, salgai
Azkenik, Doberak jakinarazi du, dagoeneko salgai daukala Gabonetako loteria, bulegoan. Ohi bezala, 5 euroan daude: 4 euro jokatzen dira, eta euro bat elkarteari laguntzeko da.