Urteurren borobila bete berri du egunotan, Alkoholiko Anonimoen Santa Barbara Taldeak. 1968ko urriaren 15ean sortu zuten Hernanin, eta beraz, 50 urte bete zituen astelehenean.
Eta ez dute alperrik pasatzen utzi nahi izan, data berezia. Horregatik, hitzaldi solasaldia antolatu dute gaur, Sandiusterriko aretoan, eguerdiko 12:00etan hasita. Bertan, parte hartuko dute, medikuntzako profesional batek, Alkoholiko Anonimoen zenbait kidek, eta Al-Anon alkoholikoen senide eta lagunen laguntzarako elkarteko zenbait kidek. Herritar guztiei irekia izango da.
Etxe partikular batean, aurreneko bilerak
Orain 50 urte sortu zen Santa Barbara Taldea, baina aurreneko terapia bilerak, hori baino lehenago egin zituzten Hernanin. Hasierako horiek, etxe partikular batean egiten zituzten, eta pertsona gutxi batzuk elkartzen ziren. Pixkanaka, jende gehiago batu zen taldera, eta Plazako lokal batera mugitu ziren. Orduan erabaki zuten Santa Barbara Taldea eratzea. 1968ko urriaren 15ean izan zen, eta beraz, hori hartzen da taldearen sorrera data gisa.
Gerora, mugitu ziren gaur egun Musika Eskola den eraikineko lokal batera; han bertan zegoen kokatuta DYA ere. Eta azkenik, Sandiusterriko beheko lokaletara aldatu ziren; gaur egun dagoen tokira, hain justu. Bertan egiten dituzte bilerak, eta telefono bat ere badaukate, herritarren harretarako: 943 33 11 03.
Astelehen eta ostiraletan egiten ditu terapia saioak, Santa Barbara Taldeak, arratsaldeko 19:30etan hasita. Ostegunetan, berriz, informazio saioak egiten dituzte 19:00etan, gaixo alkoholikoak sendatzeko programa ezagutu nahi dutenentzat. Eta lokal berean biltzen dira, Al-Anon taldeko senide eta lagunak ere: asteazkenero elkartzen dira, 18:30etan.
Saio horietan, konpartitzen dituzte beraien esperientzia pertsonalak, eta haiengana jotzen duten kideen anonimotasuna gordetzen dute guztiz.
Nabarmendu nahi izan dute, beste behin: «alkohololismoa ez da bizio bat; gaixotasun bat da, sendaezina eta progresiboa, baina gelditu daitekeena. Horretarako, edateari uzteko benetako gogo zintzoa behar da».