Sorpresa emateko asmoz, finala gaur Gurutzealdek!

Urrea edo zilarra, baina do­mi­na batekin bueltatuko da Oier Gurutzealde, Munduko Txapel­ketatik. Seguru dauka hori!
Izan ere, finala jokatuko dute gaur, Frantziaren kontra, eguerdiko 13:00etan. Partidu zaila, astigartarrak aurreratu duen bezala: «lasai aterako ga­ra kantxara, presiorik gabe, ez baitaukagu ezer galtzeko. Eta ea sorpresa ematerik daukagun!». Edozein kasutan, Eneko Maiz billabonatarrak jokatuko du finala, bera aukeratu baitu hautatzaileak: «zaila ikusten nuen nik jokatzea, Eneko se­kulako mailan aritu baita par­ti­du garrantzitsuetan», azaldu du Gu­­rutzealdek. Jokatu duen partidu bakarra, nagusitasunez irabazi du astigartarrak, hala ere: 15-7 eta 15-1, Uruguay­ren kontra, ligaxkan.
Semifinala, ordea, Maizek jokatu zuen, eta bi setetan na­gusitu zitzaion Kubako Jhon Silver Li­naresi (15-4 eta 15-5), finalerako txartela lortzeko.
Gaur, urrezko dominaren lehian, Battitta Ducassou itxasuarra izango du aurrean billa­bonatarrak, ia seguru. Izan ere, lapurtarrak jokatu ditu, orain arteko partidu guztiak.
Finala zuzenean ikusteko aukera izango da, interneten: www.laliga4sports.es webgunean, Directos atalean.