Haundia egin zuen atzo Amaia Irazustabarrenak, Maider Mendizabal anoetarrarekin: Munduko Txapelketaren finalerako sailkatu ziren, Mexikori irabazita, partidu luze bezain gogorrean. Galdu egin zuten aurreneko seta (9-15); erasora beraiek jo zuten, baina akats dezente egin zituen Mendizabalek. Ez ziren eroso ibili bigarrenean ere, baina lortu zuten buelta eman eta partidua berdintzea (15-9). Desenpatean jokatu zen dena, beraz, eta izugarri luze jo zuen. Berdinduta joan ziren askotan, eta azkenean, hernaniarraren zenbait tanto bikain tarteko, aurrea hartu eta partidua irabaztea lortu zuten (10-8).
Horrela, hernaniar bat ez, bi izango dira finaletan: Irazustabarrena palaz eta Aitor Gorrotxategi eskuz; biak ere, goizeko 11:00etan. Eta Frantziaren kontra jokatuko dute biek, gainera.
Bi partiduak zuzenean ikusi ahal izango dira, internet bidez: www.laliga4sports.es webgunean, Directos atalean.