Ekintza ugari antolatu ditu, urrian zehar, Hernaniko Kaleratzeak Stop taldeak, Etxebizitzaren Astea deitu dutenaren barruan. Eta gaur emango diote bukaera, hiru zita berezirekin; Tilosetan izango dira denak, eguerditik gauera.
Hasteko, kale antzerki saioa eskainiko du Barsani Konpainiak, eguerdiko 13:00etan hasita: Kale gorrian.
Gero, iluntzean, doinu eta hitz jolas nahasketa berezia izango da Tilosetan: bertsolariak eta raperoak igoko dira taula gainera, elkarrekin, etxebizitza duin eta eskuragarria gai hartuta.
Hiru kontzertu, gauean
Eta azkenik, hiru kontzertu izango dira gauean, 23:30etan hasi eta 01:30ak arte. Andoni Tolosa Morau hernaniarrak eskainiko du aurrenekoa, eta J. Tiroren eta El Quinto Con Tenedor taldearen emanaldiak izango dira gero.
Hiru emanaldi berezi horiekin, Kaleratzeak Stopek bukatutzat emango du Etxebizitzaren Astea. Etxebizitza duin eta eskuragarri baterako eskubidea aldarrikatu nahi izan dute, eta gaiaren inguruan herritarrak informatu. Horretarako, eskaini dituzte hitzaldiak, batzar irekiak, mahai inguruak... Beste modu batera emango dute gaiaren berri gaurkoan, antzezle, bertsolari, rapero eta musikarien ahotik, festa giroan agurtzeko Etxebizitzaren Astea.