«Ze aukera polita! Guztioi ez digute halako aukera bat luzatzen, aprobetxatu beharra daukagu!», pentsatu zuen Mercedes Ortega Hernani BHIko Gizarte Heziketako irakasleak, Gipuzkoako Foru Aldundiak Gazteen Gipuzkoa egitasmoan parte-hartzeko gonbitea luzatu zienean.
Eta halaxe hasi zen dena. «DBH4ko 140 ikasletik, nola hautatu 20?», hori izan zen aurreneko dilema, baina segituan argitu zen: «gelaz gela joan nintzen, eta proiektua azaldu nien. Borondatez eman zuten izena; hasieran 16 ziren, eta azkenean, 13 geratu ziren».
Horiekin osatu zuten proiektua ekainean, Etorkizuna Amestuz izenburupean.
Proiektu irekia
Hasieratik proiektu ireki bezala aurkeztu zien Foru Aldundiak: «Etorkizuna Eraikizen barruan, beraiek nahi zuten etorkizuna denon artean eraikitzea. Enpresekin egin zuten, eta konturatu ziren etorkizuna gazteena zela. Baina, gazteei nola galdetu? Eta orduan jo zuten guregana», azaltzen du Hernani BHIko irakasleak.
Denera 20 ikastetxe hautatu zituzten: sare publikoko bost ikastetxe, Kristau Eskolako beste bost eta hamar ikastola. Denera, 520 ikaslek hartu dute parte, Foru Aldundiak emandako datuen arabera.
Esan bezala, proiektua erabat irekia zen, hortaz, «bakoitzak egin du nahi duena», onartu du Ortegak.
«Medio gutxirekin etekin ona lortu dute», nabarmendu du Mercedes Ortegak.
Hernani BHIren kasuan, blog bat sortu dute, eta bertan, elementu ezberdinek egin dute bat: etorkizunaamestuz.blogspot.com.
Ideia-jasarekin, hasiera
Aste Santuan jakin zuten proiektuaren berri, baina hainbat konturengatik, ekainean eraman zuten aurrera proiektu osoa: «bost egunetan egin genuen».
Nahiz eta Ortegak «gidoi txiki bat» eraman zuen, ideia-jasarekin hasi zuten proiektua, ikasleen beraien interesak jasotzeko asmoz: «proposamen oso desberdinak atera ziren, eta horiek jaso ditugu blogean».
Bertan aurkitu daitezke, besteak beste, insitutuko ikaskideei egindako inkesta bat, hainbat gairen ingurukoa, egungo egoera aztertzeko asmoz; argazkien bidez, gazteen ametsak irudikatzen dituzte, baita ere; eta bukatzeko, egungo arazoei, etorkizuneko konponbideak ematen saiatzen dira.
Hori guztia laburbiltzeko, bideo bat ere ikusi daiteke: «hori osatzeko, ikasleek lan pilo bat egin zuten, agian, nik espero ez nuena. Nabarmentzekoa da bideoa», dio Ortegak.
Bere ustez, «medio gutxirekin etekin ona lortu dute». Eta Mercedes Ortegarentzat garrantzitsuena dena da «benetan beraiek egina» dela. Bideoan, ikasle batek egin du bertsoa, montajea ere beraiek egin dute...
Bai bideoa, baita beste gainontzeko lanak ere, Etorkizuna Amestuz blogean daude, ikusgai.
Azaroaren 15ean, aurkezpena
Orain, gainontzeko eskolekin batera, egindako lan guztia aurkeztuko dute Gipuzkoako Foru Aldundiak antolatutako ekitaldian. Gazteen Gipuzkoa izenburupean, zortzi saio antolatu dituzte, gazteen lanak ezagutzeko; azaroaren 15ean izango da hernaniarren txanda.
Goizeko 11:00etan daukate zita, Foru Aldundiaren egoitzan, Donostiako Gipuzkoa plazan. «Nahiz eta ikasle batzuk dagoeneko hemen ez egon, badirudi denak joango garela», dio Ortegak; dena den, «aurkezpena bik egingo dute». Horren aurrean, «pixka bat urduri» badaudela onartu du irakasleak.
«Merezi izan du»
Behin proiektua bukatuta, ekainean, balorazio-txostena egin behar izan zuten irakasleek. Izan ere, Mercedes Ortega izan zen arduraduna, baina beste hiru ere aritu ziren laguntzen, borondatez hauek ere: Ana Goena, Gorka Lete eta Nerea Zapirain.
Zalantzarik gabe «merezi izan duela» uste du Ortegak, nahiz eta «lan asko» egin behar izan duten. Onartu du «irakasleontzat ere, lan extra» izan dela.
Horrez gain, ikasleei ere inkesta bat pasa diete Foru Aldunditik. Haiek ez dakite zer erantzun duten, baina «esan digute interesgarria izan dela».
Bi arazo, antzemanda
Dena den, bi arazo ere antzeman dituzte. Batetik, «denbora falta». Ortegaren ustez, «ikasturte osoan zehar garatzeko proiektua izan beharko litzake, astean, ordubetez. Gauza asko landu daitezke-eta!».
Izan ere, «halako proiektuak garrantzitsuak dira ikasleen interesak lantzen dituztelako».
Bestetik, baliabide ekonomikoen falta ere arazo izan da. Berez, 1.000 euro jasoko ditu eskola bakoitzak, Foru Aldundiaren hitzetan, «euren beharrizanetara bideratzeko». Baina Mercedes Ortegak dio, «ea iristen diren!»: «diru honen zain gaude; eskolak aurreratu behar izan digu, baina ez dugu dena gastatu».
Diru gutxi gastatu dute proiektuan, tartean, «kamixeta batzuk» egiten. Bestela, txango bat egin zuten paddle surf egitera eta bazkaltzera partehartzaileekin; gainontzekoa, ikusiko dute zertan inbertitu: «ikasleen onurari, goxotasunari begira egin behar da zerbait!», Mercedes Ortegaren ustez.
IKASLEAK
Lierni Cuadrado
Maria Devesa
Miguel Dominguez
Ane Gil
Eider Gonzalez
Ibai Heras
Ane Irazusta
Uxue Ollo
Eneka Iribarren
Ianire Azevedo
June Garmendia
Alazne Macicior
Nahia Robles
IRAKASLEAK
Ana Goena
Gorka Lete
Mercedes Ortega
Nerea Zapirain