Festa giroan borobilduko dute, beste urte batez, Hernaniko Bakailu Astea. Bihar izango da hori, goizeko 11:00etatik eguerdiko 14:30etara, Atsegindegin egingo duten Bakailu Festarekin.
Denetik izango da bertan. Batetik, goiz osoan ariko dira sukaldatzen, bakailua pil-pil eran lehiaketako partehartzaileak, plater goxoena nork prestatuko. Bitartean, bakailu saltzaileek ere postua jarriko dute Atsegindegin. Lehiaketa bukatzean, sariak banatuko dituzte: bai bakailua pil-pil eran lehiaketako onenei, eta bai pintxo onena prestatu zuen tabernari ere. Atzo iluntzera arte zeukaten bozkatzeko aukera, herritarrek.
Eta sari banaketen ondoren, bakailu pintxoak edota sagardoa ere izango dira aukeran, besteak beste.
Bisita gidatuetarako, bertara azaltzea nahikoa
Baina festaren aurretik, besterik ere izango da, Bakailu Astearen barruan. Hernaniko hirigune historikoan bisita gidatu bana egingo dute gaur eta bihar, 11:00etan, Biteriko turismo informazio puntutik abiatuta: gaztelaniaz gaur, eta euskeraz bihar. Doakoak dira, eta ez da izena eman behar; bertara azaltzea, nahikoa.