Gipuzkoako Foru Aldundiko Mugikortasuneko diputatu Marisol Garmendiak eta Hernaniko alkate Luis Intxauspek hitzarmena sinatu dute Akarregiko bidegorria egokitzeko, eraberritzeko, seinaleztatzeko eta mantentzeko. 908 metroko bide-zati honek 96.000 euroko kostua du eta Foru Aldundiak finantzatuko du.
Plazaolako Bidearekin bat
Akarregi industrialdetik pasatzen den bizikletentzako eta oinezkoentzako 908 metroko bide-zatiak Hernani eta Donostia lotzeko bidea osatuko du, eta, gainera, ibilbide hori Leitzatik pasatuz, Irurtzuneraino iristen den Plazaolako Bide Berdearekin lotuko du. Bide hori osatzeko, hiru kilometro besterik ez dira falta. Proiektu horri esker Donostiatik Irurtzunerainoko 75 kilometroko ibilbide bat osatuko da, eta zati erabakigarria izango da Buruntzaldeko mugikortasun jasangarri eta osasungarrirako.
96.000 euroko aurrekontua
Foru Aldundiak finantzatuko duen bidegorri honen aurrekontua 96.000 eurokoa da; lanak datorren azaroan hasiko dira eta sei asteren buruan bukatuko dira; aurreikuspenen arabera, 2018. urtea bukatu aurretik.
Marisol Garmendia Mugikortasuneko diputatuak esan zuenez, «bide hau apustu estrategikoa da Foru Aldundiarentzat, Buruntzaldeko eskualdean eta Gipuzkoa osoan bizikleta erabiltzea eta mugikortasun jasangarria eta osasungarria sustatzearen alde egindako apustuan. Ia kilometro bat izango duen zati horrekin osatuta geratuko da bidea, eta funtsezkoa da, beraz, ibilbide hori amaituta eta herritarrek erabiltzeko prest gera dadin».
Luis Intxausperen hitzetan, «Udalak mugikortasun jasangarriarekiko konpromiso sendoa du eta bidegorrien sarea hobetzea eta zabaltzea albiste ona da hernaniarrontzat».
Akarregiko bidegorrian, besteak beste, zorua konponduko da, asfaltoa oso hondatuta baitago. Horrez gain, seinale bertikalak eta horizontalak jarriko dira, bizikleten eta oinezkoen trafikoa banatzeko; bidegorria zati batzuetan zabaldu egingo da; eta zebra-bideak igo egingo dira segurtasunagatik.