Astelehenean bete zituen 50 urte, Alkoholiko Anonimoen Santa Barbara Taldeak eta larunbatean 50garren urteurrena ospatuko dute. Hori horrela izanik, larunbaterako hitzaldi-solasaldi bat antolatu da, 12:00etan, Sandiusterriko aretoan. Bertan medikuntzan aditua den sendagile bat egongo da, Alkoholiko Anonimoak elkarteko kideak eta baita Al-Anon (familiarrak eta lagunak) elkarteko lagunak ere.
Lehenengo bilerak etxe partikularretan egiten ziren eta pixkanaka, kide gehiago batu zirenean, Gudarien Plazako lokal batean hasi ziren bilerak egiten, Luistarren lokalean hain justu. Orduan eratu zen Santa Barbara Taldea, 1968ko urriaren 15ean.
Ondoren, gaur egun Musika Eskola denaren bulego batera pasa zen elkartearen egoitza. Eta azkenik Sandiusterriko beheko solairuan jarri zen Santa Barbara Taldea eta bertan jarraitzen dute gaur egun.
Alkoholismoa, gaixotasuna
Santa Barbara Taldeak adierazi du, milioika pertsona izan direla, urte guzti hauetan, alkoholismoaren gaixotasuna geldiaraztea lortu dutenak, elkartearen eskutik: «alkoholismoa ez baita bizio bat, gaixotasuna baizik; sendaezina, progresiboa eta heriotza eragiten duena, baina geldiarazi daitekeena. Horretarako, disposizioa eta edateari uzteko nahi zintzoa behar dira».
Horregatik, gogorarazi du bere ateak zabalik dauzkala, Alkoholiko Anonimoen laguntza nahi duten guztientzat: «alkoholarekin arazoak dauzkazula uste baduzu, jar zaitez gurekin harremanetan».
Terapia bilera itxiak astelehenetan eta ostiraletan egiten dira. 19:00etatik aurrera ostegunetan, programaren eskaintza dago interesatuen eskura eta asteazkenetan, 18:30etan, sendiaren eta lagunen Al-Anon taldea biltzen da Sandiusterrin.