ETXEBIZITZAREN Astea azken txanpan sartzen ari da eta indar haundiarekin amaitu nahi dute. Honela, ekintza desberdinak antolatu dituzte aste guztian zehar. Dagoeneko egin dituzte hainbat jarduera, eta larunbat honetan borobilduko dute azken festarekin.
Gaur egingo dute asteko aurreneko ekintza udaletxeko areto nagusian, 19:30etan hasita. Benetan interesgarria izango da eta argigarria askorentzat. Landuko den gaia Etxebizitza arazoetarako konponbideak izango da.
Mahai-ingurua antolatu da, eta Eusko Legebiltzarreko parlamentariek hartuko dute parte: Maite Otamendi EH Bildutik, Irune Berasaluze EAJtik, Tinixara Guanche Elkarrekin Podemosetik, eta Patricia Borinaga PSE-EEtik. Etxebizitza arloko beren taldeko arduradunak dira denak.
Bestalde, Kaleratzeak Stop taldearen ordezkari gisa, Marce Garcia ere izango da bertan; Kaleratzeak Stop Euskadiko Etxebizitzaren koordinatzailea da Garcia.
Irati Sarasua arituko da moderatzaile-lanak egiten. Euskera-gaztelania aldibereko itzulpen zerbitzua egongo da, baita zeinu-hizkuntzako interpretea ere.
Gabriel Zelaian hitzaldia, bihar ordu berean
Asteak ez du etenik eta bihar hitzaldia egongo da, oraingo honetan, Gabriel Zelaia eraikineko Iturola espazioan. 19:30etatik aurrera, Etxebizitzaren esperientzia berriak: erabilera lagatzeko kooperatibak gaia izango dute hizpide.
Gaia lantzeko, bertan izango dira Anna Rubio, Bartzelonako La Borda Kooperatibako kidea, eta Nahiko Arraiza eta Laura Muelas, Donostiako Abaraskako kideak. Beraiek bizitakoa, beren esperientzia kontatuko dute.