Datorren urteko udal hauteskundeetarako, alkategaia aukeratzeko prozesua jarri du martxan Hernaniko EH Bilduk. Eta prozesu horretan hartuko dute parte, alderdiko militante eta jarraitzaileek.
Bihar zabalduko dute epea, alkategaia aurkeztu eta bozkatzeko, eta urriaren 28ra arte izango da aukera. Horretarako, EH Bilduren barne-erroldan erregistratu behar da, eta bi modu daude: interneten, elkarrekin.ehbildu.eus helbidean; edota aurrez aurre, Andre Kalean EH Bilduk daukan lokalean, urriaren 19, 24 eta 26an 18:00etatik 20:00etara. Gainera, hautagaitza aurkeztu nahi duenak, erregistratuta dauden beste 15 lagunen abala beharko du.
Behin alkategaiak aurkezteko epea igarota, azaroan egingo dute bozketa, proposatu diren hautagaien artean. Azaroaren 9tik 22ra izango da, eta militanete eta jarraitzaileek bozkatu ahal izango dute. Boto gehien lortzen dituena, izango da EH Bilduren alkategaia, hauteskundeetan.
Herri Bilgunea asteazkenean, zalantzak argitzeko
Datorren asteazkenerako, gainera, Herri Bilgunea egiteko zita jarri du EH Bilduk. Arratsaldeko 19:00etan izango da, Biteri kultur etxean. Bertan, argituko dituzte prozesuari buruzko zalantzak eta erabakiko dituzte beste zenbait xehetasun, 2019ko udal hauteskundeei dagozkienak.