Atzo hasi zen futbol asteburua Zubipen, lau partidurekin; eta beste hiru jokatuko dira gaur. Partidu garrantzitsuak izango dira, gainera; eta «ikusteko politak», CD Hernanitik aurreratu dutenez. Bertaratzeko gonbitea luzatu diete herritarrei.
Ohorezko Erregional mailako mutilek, Anaitasuna liderra hartuko dute etxean, arratsaldeko 16:30etan hasita. Garaipena bilatuko dute, aurreko asteko partidu onari segida eman eta puntako postuetara gerturatzeko. Laugarren daude orain, liderra bost puntura dutela.
Eta seniorren ondoren, Nazional mailako mutil jubenilek jokatuko dute Zubipen, Antiguokoren kontra, 18:30etan.
Eguerdian izango da, aurretik, Zubipeko hirugarren partidua: Ohorezko Mailako neska kadeteek jokatuko dute, Intxaurdiren kontra, 12:00etan.
Euskal Ligakoak, Tolosan
CD Hernaniko beste talde nagusia, Euskal Ligako neskena, etxetik kanpo ariko da asteburu honetan. Tolosan jokatuko dute gaur, Usabal zelaian, arratsaldeko 15:30etan hasita.
Kontrario gogorra izango dute Tolosa, hirugarren postuan baitago sailkapenean. Baina hernaniarrek partidu bakarra galdu dute aurten, bederatzigarren egonda ere.