Domina banarekin bueltatuko direla jarri dute kinieletan!

Ez dira etxetik asko urrunduko, baina beste dimentsio batean sartuko dira bihartik, Aitor Gorrotxategi eta Amaia Irazus­ta­barrena hernaniarrak, eta Oier Gurutzealde astigartarra. Pelotako Munduko Txapelketa jokatuko da Bartzelonan, bihar hasi eta urriaren 20ra bitarte, eta bertan izango dira hiruak: «esperientzia ederra da Mun­du­ko Txapelketa bat jokatzea, besteetatik oso ezberdina, eta pila bat ikasten da. Mailari eta jokoari dagokionez, aldaketa haundia da», nabarmendu du Irazustabarrenak.
Ez baitu aurreneko Mun­dia­­la izango, palista hernaniarrak; ezta Gurutzealdek ere. Mexikon izan ziren biak, duela lau urte jokatu zenean; eta 22 urtez azpiko mailan ere jokatu dute Munduko Txapelketa. Estrei­na­tuko dena, Gorrotxategi da: «Munduko Kopa jokatu nuen iaz, Mundialerako txartela lor­tze­ko; baina aurrenekoz izango naiz Munduko Txapelketan».
Ez da bera izango, ordea, ur­durien egongo dena: «gauza hauek nahiko ondo eramaten ditut normalean, eta oso lasai egon naiz orain arte. Baina ziur se­mi­finala edo finala iristen di­re­nean, tripako kilimak ha­si­ko direla... Oraingoz, jokatzen hasteko gogoarekin», dio berak. «Ba ni dardarka nago dagoeneko!», onartu du Irazus­taba­rre­nak: «baina gogotsu, luze egiten baita, apiriletik prestatzen hasita».

Sarrerak, aspaldi bukatuta
Gurutzealdek ere aipatu du, par­tidu garrantzitsu bat toka­tzen denean, beti nabaritzen dela urduritasuna: «gainera, frontoiak beteta egongo dira; aspaldi saldu ziren sarrera guztiak. Nik duela hilabete begiratu nuen, familiakoek partiduak ikusi ahal izateko, eta dagoeneko ez zegoen bakar bat ere. Salgai jarri eta gutxira bukatu ziren». Zentzu horretan, Irazustabarrenak nabarmendu du, «giro polita» sortzen dela frontoian.
Sarrerarik gabe geratu direnek, hala ere, izango dute nola ikusi, partidu garrantzitsuenak: zuzenean emango dituzte, telebistan edo interneten, semifinalak eta finalak.

Amaia Irazustabarrena: «helburua irabaztea da beti»
30 metroko frontoian jokatuko du Irazustabarrenak, paleta ar­gentinarra eta gomazko pelota­rekin, binaka: «12 palista ginen preselekzioan, eta lau geratu ga­ra azkenean; Maider Mendi­zabal anoetarra, Ingrid Ruiz mur­tziarra, Patricia Gon­zalez ka­nariarra eta ni. Beraiek fron­tenisetik datoz, eta Maider eta biok ez gaude ohituta ho­rre­la­ko frontoietan; hemen ez daude. Txapa beherago dago, eta errebotea gertuago jartzen dute, mu­gikorra. Horre­ga­tik, Va­len­tzian aritu gara entrenatzen; zortzi kontzentrazio egin ditugu, udara osoan zehar».
Lau taldeko bi multzotan ari­ko dira aurreneko fasean: «zaila tokatu zaigu, Frantzia, Kuba eta Uruguayrekin. Kuba eta Fran­tzia kontrario gogorrak dira, eta semifinaletara pasatzea da aurrenekoa. Baina helburua ira­baztea da beti. Duela lau urte finalera iritsi ginen, baina Me­xi­koren kontra galdu genuen. Beste multzoan dago Mexiko».
Astelehenean hasiko dute txapelketa, Kubaren kontra, goi­zeko 09:00etan hasiko den jaialdian. Asteartean Uruguay izango dute kontrario, ordu be­rean; eta asteazkenean ere goizeko jaialdian, Frantziaren kon­tra. Aurrera eginda, ostiralean 15:00etan jokatuko dute se­mi­fi­nala, eta larunbatean 09:00eta­tik aurrera dominen lehia.

A. Irazustabarrena: «multzo zaila tokatu zaigu, eta aurreneko gauza semifinaletara iristea da. Baina helburua irabaztea da; duela lau urte, finalera iritsi ginen».

Aitor Gorrotxategi: «multzo erraza daukagu, baina gero...»
Irazustabarrenaren frontoi be­re­an ariko da Gorrotxategi, bai­na txapa gorago jarrita eta erre­bote mugikorrik gabe; 36 me­tro­ko frontoia izango da. Eskuz binaka ariko da bera, beste hiru taldekiderekin: Xabier San­txo usurbildarra, eta Eneko Yoldi eta Mikel Beroiz nafarrak. Zor­tzi laguneko preselekziotik au­keratu zituzten. «Partidu ba­koi­­tzean bik jokatuko dugu, baina bezperara arte ez dugu jakingo zeinek», dio hernaniarrak.
Frantzia eta Mexiko izango dituzte, kontrario gogorrenak: «Frantziarekin Xala ariko da, eta Mexikon beti ateratzen dira pelotari onak. Irabazteko asmo­tan joango gara, baina kostako zaigu». Bi fase oso ezberdin izango ditu txapelketak, haientzat: «multzo erraza tokatu zaigu, Estatu Batuak eta Kubarekin; baina noski, gero Frantzia edo Mexikoren kontra jokatu behar­ko dugu semifinaletan, eta bietako edozein tokatuta ere, partidu oso gogorra izango da».
Finalean Xalaren kontra ari­tzea gustatuko litzaioke Gorro­txategiri: «badaramazkigu bi urte elkarrekin jokatzen, eta oso laguna dut, askotan egoten gara elkarrekin. Lehia polita izango litzateke finala bere kontra jokatzea; eta egia esan, Xalaren kontra irabazteak, beti ematen dio balio gehiago».
Astelehenean ekingo dio Go­rrotxategik ere, 16:00etan hasita Kubaren kontra; eta ordu berean asteartean, Estatu Batuen kontra. Ostegunean 16:00etan izango dira bi semifinalak; ostiralean 10:00etan jokatuko da brontzea lor­tzeko lehia, eta larunbatean, 18:00etan hasita, final haundia.

Aitor Gorrotxategi: «Frantziarekin Xala ariko da; oso laguna dut, eta polita izango litzateke, finala bere kontra jokatzea. Hari irabazteak balio gehiago ematen dio».

Oier Gurutzealde: «saiatuko gara gerra ematen, eta zergatik ez, sustoren bat ere bai»
Trinketean ariko da, aldiz, Oier Gurutzealde: «buruz buru joka­tzeko aukeratu naute, Eneko Maiz billabonatarrarekin batera. Astebetean lau edo bost partidu izango dira, eta beraz, partiduaren eta egoeraren arabera ikusiko dugu, zeinek jokatuko duen», azaldu du.
Eta bere kasuan, ez du za­lan­tzarik egiten, faboritoak zein diren esateko garaian: «mexi­ka­­rrak ere arriskutsuak dira, baina Frantzia jotzen da beti faborito, Ipa­rral­deko pelotariekin. Beti horretan aritzen dira, eta profesionalak dira». Hain justu, astigartarra ere aurten hasi da Iparraldean jokatzen: «hemen betiko lau edo bostak gaude, antzeko maila batean, baina ez gara asko; eta hara jo dut, mailan koxka bat gora egiten saiatzeko. Hirugarren mailan hasi behar izan dut, bajuenean, baina bigarren mailara igo naiz datorren urterako. Ea pixkanaka hobetzen nijoan».
Hori horrela, «gerra pixka bat» emateko esperantza ba­dau­ka astigartarrak; «eta zergatik ez, sustoren bat ere bai». Kiniela guztiak, behintzat, egin­da dauzka aurrez: «hiru taldeko bi multzo izango dira, eta Me­xi­ko eta Uruguayrekin gaude gu. Bestean Frantzia aurrenekoa izango da ziurrenik; beraz, ea biak irabazten ditugun, aurrena sailkatzeko, eta semifinalean Kubaren kontra jokatzeko, fi­na­­lerako txartelaren bila. Mexiko gogorra izango da, ordea».
Astelehenean bertan, goizeko 10:00etan dauka zita, txapel­keta hasteko, Mexikoren kontra; asteazkenean, ordu berean jokatuko dute Uruguayren kon­tra. Ostegunean izango dira bi semifinalak, 09:00etan hasita; ostiralean 11:00etan hirugarren eta laugarren postuetarako lehia, eta larunbat eguerdian, 13:00etan, finala.

Oier Gurutzealde: «trinketean Frantzia da faborito beti, profesionalak dira. Ea finalera arte  saihesten ditugun, gure multzoan aurrena sailkatuta».

Bartzelonako frontoiak probatzen, orain bi aste
Kontrarioak, gutxi edo gehiago, ezagutzen dituzte hiru pelotariek; eta frontoiak ere, ez dituzte ezezagun izango. Orain bi aste izan ziren Bartzelonan, selekzioko kide guztiak, Espainiako Kopa jokatzen: «Mundiala pres­tatzeko aitzakia da gehienbat. Txuriz janzten zarenean, beti daukazu beste tentsio puntu bat, eta horretarako asmatu zuten kopa hau», dio Gorrotxategik.
«Baina oso ondo etortzen da, aurretik ikusteko frontoia no­la­koa den, zein ezaugarri ditu­en, eta nola ibiltzen den pelota han», nabarmendu du Gurutze­aldek: «trinketean, esaterako, nabaritu dugu nahiko bizia dela. Frontisetik asko ateratzen da pelota, eta lurrean ere ibil­tzen da, pelota berria tokatuz gero. Gainera, hemengoak bai­no metro eta erdi edo bi metro luzeagoa da, eta banaka joka­tzeko, asko nabaritzen da. Erre­boteatu eta bueltatzeko urruti geratzen da, eta exijentea da».
Frontoia, aldiz, ez da he­men­goen oso desberdina, Go­rro­txategik azaldu duenez: «bai­na bai konturatu ginela, frontoi exijentea dela. Pelotak karga asko hartzen du, eta lur bizia dauka. Frontoi gogorra da».

Etxekoek ere, ilusioa
Beraiek ez dira, txapelketarako gogoz dauden bakarrak: «etxekoei ere egiten die ilusioa, ho­rre­lako txapelketa batera joateak», dio Gurutzealdek: «nire gu­rasoak aurrenekoz joango dira, orain artekoak urruti to­katu direlako. Aurreneko asteburuan egongo dira, sarrerarik ez dugu lortu eta... Baina aurkezpen ekitaldia ikus, eta zer giro dagoen, behintzat».
Sarrerarik gabe joango dira Gorrotxategiren gurasoak ere: «finalera iristen bagara behin­tzat, badaukate bertan egoteko esperantza... Jokatzen badut, zer­bait asmatu beharko dugu».
«Nireak bai, sarrerarekin doaz aste osorako, eta lagun batzuk ere bai, azkeneko asteburuan. Finalerako sarrerak erosi dituzte; beraz, badaukate esperantza!», dio Irazustaba­rre­­nak. «Haiek gu baino azkarrago ibili dira sarrerekin!», erantzun dio Gurutzealdek barrez.

Maiatzetik, fisikoa etajanaria asko zaintzen
Iritsi zaie beraien maila onena emateko eguna, hilabete askotan prestatu ondoren: «frontoiko lanaz aparte, fisikoa eta janaria asko zaindu behar izan di­tu­­gu, maiatzetik», azaldu du Go­rro­txategik. «Zenbait proba fi­si­ko egin ditugu, aurrenekoa or­du­an, eta bakoitzaren emai­tzen arabera, prestaketa konkretu bat eta dieta bat bidali ziguten. Batzuk ikusten da fisikoki oso ondo daudela, baina gu hortxe gaude, tarteko maila horretan!», dio Gurutzealdek barrez.
«Minimo bat eskatzen dute, eta ondo gainditu genuen, bai­na egia da fisikoa asko lantzen dela; korrika egitea tokatu zai­gu asko. Eta dietarekin ere berdin, pixua jaitsi dugu de­nok», kontatu du Gorrotxategik. «Au­rre­neko probatik azkenekora, ahal duzun guztia egin behar duzu hobetzeko, eta ikusi da emaitzak hobeak izan direla», gehitu du Irazustabarrenak.
Sasoi punturik onenean iri­tsiko dira Bartzelonara, beraz; eta ahalik eta emaitzarik one­na lortzeko asmoz. Astigarra­ga­ko Txomiñene frontoian el­kar­tuta, hurrengo zita ere jarri dute: «Bartzelonatik bueltan be­rriro hementxe, baina orduan domina banarekin!», adostu dute. «Baina hori bai, ordurako dieta kontuak harrika botata!», argitu du Irazustabarrenak, hi­ruen barre algaren artean.