Datorren igandean, urriaren 21ean, egingo du hurrengo irteera, Mendiriz Mendi elkarteak. Nafarroara joango gara, eta GR-11 ibilbidearen laugarren etapari jarraituko diogu: Urkiaga mendatetik abiatu, eta Adi eta Mendiaundi mendietan gora ibili ondoren, Orreagan bukatuko dugu.
Laugarren etapa hau ez da oso luzea. Bide erosoetatik doa, eta ongi seinaleztatua dago. Nahiko da beraz, marka zuri-gorriak jarraitzea. Lainoa topatzen baldin badugu, galtzeko toki bakarra Sorogain eta Mendiaundi arteko igoera denez, hor jarri beharko da arreta.
Ibilbidearen profilak, bi igoera eta bi jaitsiera nagusirekin, M forma du. Gora egiten duen lehenengo tartea, Urkiaga mendatetik Adi aldera doana da. Bertatik, Sorogain izeneko aterpera jaitsi behar da. Ibilbideko tarte hori, Adiko inguruak izan ezik, pago basoen barrutik egiten da. Zeharkaldi honen aurreko etaparen kronikan deskribatzen zen bezala, Kintoko oihanaren parte dira pagadi hauek. Baso hau Nafarroako baso zabalenetakoa da eta bere fauna eta landare aberastasuna izugarria da. Izena Erdi Arotik datorkio, basoaren ekoizpenaren bostena Nafarroako erregeari zerga modura ordaintzen baitzitzaion.
Bigarren igoera nagusia, Sorogainetik Mendiaundi gailurrera dagoena da. Bertatik, Orreaga edo Auritzera jaisteko aukera dago. Ibilbideari amaiera emateko, guk lehenengoa aukeratu dugu. Bigarren zati honetan, baso zatiak egon arren, goi-mendiko soroak dira nagusi.
Amaiera, euskaldunontzako toki seinalatu batean
Orreaga inguruan gertatu zen euskaldunontzat hain garrantzitsua den Orreagako guda. Bertan pairatu zuen Carolingioen ejertzitoak, 778 urteko abuztuaren 15ean, bere lehenengo porrota. Baskoiek bere herriaren askatasuna eta ohorea defendatu zuteneko lehenengo kronika historikoa dugu. Zaragozako gotorlekua ezin izan zuenean menperatu, etxerako bidean, Baskoien hiriburua zen Iruñea suntsitzea agindu zuen Carlomagnok. Agindu hori, berak arabiarrekin zuen gatazkan euskaldunok erakutsitako neutraltasunagatik izan zen.
Ekintza horrek baskoiak eta inguruko euskal tribuak elkartu zituen. Beraien arteko gatazkak ahaztu eta erlijio desadostasunak alde batera utziz (batzuek antzinako erritu paganoak jarraitzen zituzten, beste batzuk kristauak edo musulmanak ziren), egun gutxi batzutan antolatu eta zelata prestatu zuten Orreaga inguruko eremuetan.
Guda zehazki non gertatu zen ez da ezagutzen, Carolingio kronistek ez baitzuten idatzita utzi. Carlomagnoren ejertzitoaren atzealdeari eraso egin zitzaion. Ejertzitoaren zati hori 20.000 soldaduk osatzen zuten, eta Roldan buruzagiaren, Carlomagnoren ilobaren, agindupean zeuden. Gudan, Roldan eta bere soldadu gehienak hilik suertatu ziren.
Urkiaga mendatetik abiatuta, Adi gailurra inguratuz
Urkiaga mendatean, ekialdera egiten duen pista hartu behar da. Igoerak Adipe mendatera hurbiltzen gaitu. Bertan hesia zeharkatu, eta Adi gailurra bere ipar aldetik inguratu behar da, Adatun lepo aldera eginez, GR-11 bidea ez baita gailurretik pasatzen. Indartsu dagoena, gailurrera igo daiteke eta bidea Adatuneko lepoan berreskuratu.
Lepotik hego aldera egin eta Odia haranetik, malda gogor batetik, jaisten hasi behar da. Bertako pagadia ikusgarria da. Malda leuntzen denean erreka batekin egingo dugu topo. Errekari jarraituz Sorogaineko aterpera iritsiko gara.
Hemendik aurrera, bideak berriro gogor egiten du gora. Zati honetan soroetatik barrena igotzen da, eta marka zuri-gorriak ez dira hain erraz ikusten. Ordu erdi ingurura pista batekin egingo dugu topo. Pistari segi eta tarte luze batean jarraitu behar da. Bihurgune batean pista utzi eta hesi baten albotik doan bideari jarraitu behar zaio. Bideak ipar aldera egiten du, eta berehala Mendiaundi (1.210 m) gailurrera iritsiko gara.
Gailurretik, jaitsiera gogor bati jarraituz, ipar aldean dagoen Dos Puentes lepora jaitsi behar da. Bertatik, Auritz aldera jaisten hasi behar da. Auritzera iritsi baino kilometro pare bat lehenago, bidea utzi eta, ekialdera eginez, Orreagara eramango gaituen bidea hartu behar da. Berehala gara ibilbidearen amaieran.
GR-11, 4garren etapa
Distantzia: 18 kilometro.
Denbora: 6 ordu.
Desnibela: 700 metro inguru gora eta beste horrenbeste behera.
Zailtasuna: Zailtasun berezirik gabekoa.Beharrezko materiala:
Mendiko material arrunta.
Mendiriz Mendik urriaren 21ean egingo du irteera hau.