Aztertuko duten ingurunea bertatik bertara ezagutzeko, Astigarragan izan ziren asteartean EHUko Goi Mailako Arkitektura Eskolako bosgarren mailako ikasleak. Izan ere, ekainean sinatu zuten elkarlanerako hitzarmena Astigarragako Udaleko alkate Zorione Etxezarragak eta EHUko Arkitektura Eskolako zuzendari Juan Jose Arrizabalagak, orain bi urte Astigarragan martxan jarritako Santiomendi-Landarbasoko Paisaiaren Ekintza Planaren barruan.
Ikasleei harrera egin zitzaien Udalean, eta eginbeharrekoen nondik-norakoak azaldu zizkieten Itxaro Latasa eta Joseba Gainza irakasleek eta Ekintza Planaren ardura teknikoa daukan Araudi enpresako Raoul Servertek. Ondoren, aztertu beharreko ingurunea, Santiomendi-Landarbaso, bisitatu zuten.
Paisaiaren Europako Hitzarmenarekin bat
Santiomendi-Landarbasoko Paisaiaren Ekintza Planaren barruan hainbat ekintza egin ditu dagoeneko, Astigarragako Udalak, Etxezarraga alkateak azaldu bezala.
Paisaiaren Europako Hitzarmena 2000 urtean sinatu zuen Europako Kontseiluak, eta 2009an bat egitea erabaki zuen Eusko Jaurlaritzak. Horrela, 2015ean jaso zuen Astigarragako Udalak Jaurlaritzaren diru-laguntza, Plana idazten hasteko. «Santiomendi-Landarbasori bere balioa ematea da helburua». 2016an hasi zen Plana idazten, eta gaur egunera arte hainbat pauso eman dira: «webgunea sortu da (http://araudi.wixsite.com/pap-astigarraga), bideo bat osatu da, xehetasunezko kartografia egin da, lan tekniko sakona egin da... Horrez gain, urtarrilean jardunaldiak antolatu ziren. Orain, erronka da nola egin dibulgazio lana, lurraldeak daukan garrantziaren berri zabaltzeko. Eta lan horretan, zuen ezagutza, denbora eta ilusioa eskertu nahi ditugu. Zuen ikuskera gazteak, berritzaileak, lagunduko du ingurune hau hazten, bereziki, daukan balioa haunditzen. Egiten dituzuen proiektuak Ekintza Plan Orokorrean sartzeko aukera izango dugu».
Ikasleen proiektuak Ekintza Planean txertatu ahal izango dira.
Diagnostikoa eta konponbideak
Irakasleek, hain juxtu, eskertu zuten hitzarmen honi esker ikasleek izango duten aukera, kasu erreal batean lan egiteko.
Bestalde, Araudi enpresa enpresatik Raoul Servertek azpimarratu zuen Ekintza Plana
«kudeaketa tresna» bat dela, eta Astigarraga dela Plana idatzi bai, eta «martxan jarri duen udalerri bakanetakoa». Ikasleek «lurraldearen izaera, berezi egiten duena zein den asmatu» beharko dute. «Diagnostiko horrek daukan balioa onartzen dio, eta ondoren, atzematen diren arazo eta hutsuneei konponbidea bilatu ahal izango zaie».
Atxurromendi-Murgibaso, Aiako Harria Parke Naturalean
Ekintza Plana Santiomendi-Landarbasorako da, eta hiru gune izango dira kontuan: nekazaritza-paisaia, Santiomendiko herrigunea, eta Atxurromendi-Murgibaso basoa. Azken hau Aiako Harria Parke Naturalean txertatzeko asmoa ere badago, daukan garrantziagatik, besteak beste, bertako landazabal atlantikoaren balioagatik.