Beste behin, bigarren urtez egingo du bat Hernaniko Udalak Kale Gorrian lan-taldearen ikerketarekin; hau da, etxerik gabeko pertsonen egoerari buruzko datuak azaltzen dituen lanarekin.
Hori horrela, kalean bizi direnen kontaketa egingo dute, eta horretarako, dagoeneko jarri dute data: hilaren 18tik 19rako gauean egingo dute.
Herritarrei deia, parte hartzeko
Udalak azaldu duenez, helburua da «herrian dagoen errealitatea ikusi, etxerik gabeko pertsonen arazoekiko elkartasuna eta atxikimendua sortu eta udal politikak horren arabera egokitzea».
Errealitate hori ezagutzeko aukera luzatu nahi diete, hain zuzen, herritarrei; hilaren 18tik 19rako gauean egingo duten zenbaketan parte hartzera gonbidatu ditu Udalak. Interesa duenak, Zerbitzu Sozialetara jo beharko du: zerbitzusozialak@hernani.eus helbide elektronikoaren bidez edo 943 55 78 54 telefonoan.
«Herrian dagoen errealitatea ikusi» ahal izango dute herritarrek, gau horretan.
Bi urtero
Kale Gorrian ikerketaren barruan, bi urtero egiten da gaueko zenbaketa. Duela bi urte, 2016an, hartu zuen parte Hernanik aurreneko aldiz, 32 boluntariorekin. Hernanirekin batera, Araba, Bizkaia eta Gipuzkoako beste 25 herrik ere hartzen dute parte.