Sei geldialdi egingo ditu Euskal Herrian Naziorteko Inprobisatzaileen Birak, eta horietako bat izango da gaur Hernanin eskainiko dutena. Iluntzeko 20:00etan hasita izango da emanaldia, Biterin. Sarrera egunean bertan erosi ahal izango da, 7,5 euroren truke.
Hitz-andana egitasmoaren barruan antolatu du emanaldia Udalak, Mintzola Ahozko lantegiarekin eta Lanku Kultur Zerbitzuekin elkarlanean. Bertan, bertsolaritzak bat egingo du Argentinako payadarekin eta Kubako punto cubano delakoarekin.
Lujanbio eta Soto, Euskal Herritik
Hernaniren kasuan, Maialen Lujanbio eta Julio Soto bertsolariak arituko dira. Eta haiekin batera izango dira Araceli Argüello payadore argentinarra eta Tomasita Quiala repentista kubatarra. Era berean, Iker Iriarte arduratuko da saioa gidatzeaz.
Lujanbio eta Soto, Araceli Argüello eta Tomasita Quialarekin arituko dira.
Beste hainbat esperientzia
Ez da aurreneko aldia halako esperientzia batek Hernani duena geltoki. Biterin bertan egin zuten bat hainbat inprobisatzailek 2016an, Europa bat-batean topaketaren barruan.