Hainbat obligazio zehazten dira aurreko legealdian onartu zen Udaletxeko Parte-hartze, Informazio eta Gardentasun arautegi «berritzailean», eta EH Bilduk salatu du «EAJk ez duela arautegia bete». Horrez gain, «itxurakeriatan» ibiltzea ere egotzi dio, Hirigintza Plan Orokorrean egindako azken aldaketa medio, eta kontratuak esleitzeko muga aldatzearen ondorioz.
Gardentasunari dagokion atala «2015etik eguneratu gabe»
EH Bilduren esanetan hainbat arau ezartzen dira aipatutako arautegian. «Aurrekontuak lantzeko auzo bilerak egitea, herritarrak artatzeko ordutegi zehatz bat jartzea, alkateak urtero herritarrekin batzar ireki bat egitea... Beste eginbehar bat da udal webgunean dagoen Gardentasun atarian dauden datuak eguneratzea, eta EAJk 2015etik eguneratu gabe ditu: zinegotzien ordain-sariak, dietak, telefono gastuak... Honek udaleko arautegia urratzeaz gain, gatrdentasun legea ere urratzen du».
Horrez gain, legealdi bukaeran «parte-hartze politika itxurakeriara murrizteko» pausua eman izana salatu du. «Hirigintza Plan Orokorrak aldatzeko herritarren egiazko parte-hartzea bermatu behar dela dio legeak. EAJk agiri hau abuztuan jarri zuen jendaurrean, herritar gehienak oporretan daudenean, eta herritarrekin egin beharreko parte-hartze saioa alegazio epetik kanpo egin zuen. Beraz, EAJ eta PSE-EEren erabakiagatik, herritarrei informazio eta parte-hartzea erabat mugatu zaie».
«Ustelkeria eta adiskidekeriari ateak itxi behar zaizkio»
Bestalde, azken Plenoan Parte-hartze, Informazio eta Gardentasun arautegian egindako aldaketa salatu du. «Arautegiaren arabera, 9.000 euro baino gehiagoko kontratuak esleitu aurretik, hiru enpresari eskatu behar zitzaikion eskaintzak. EAJk muga hori 15.000 eurora aldatu du (...). Orain, PSE-EEk babestutako EAJren aldaketarekin, 10.000 euroko kontratuak zuzenean esleitu ahal izango dira. Honekin EAJk kontratuak esleitzeko askatasun gehiago nahi du. Gardentasunean eta parte-hartzean sakontzeko garaia da, eta behingoz ustelkeria eta adiskidekeriari ateak itxi behar zaizkio».