Ikasturte berriarekin batera, bueltan dira Hernaniko Hezkuntza Plataformak antolatzen dituen Hezkuntza Eskolak. Aitak non daude? izenburupean egingo dute aurrenekoa, pare bat aldaketekin: ordua aurreratu egin dute, arratsaldeko 17:30etan izango da, hemendik aurrera, eta gainera, zaintza zerbitzua ere eskainiko dute, partehartzea sustatzeko asmoz.
Aurten, zaintza zerbitzua ere eskainiko dute, eskolak iraun bitartean.
Gurasoen rolak, aztergai
Oraingo honetan, gurasoen rolak izango dituzte hizketagai. Izan ere, haiek azaldu duten bezala, «guraso izatea gauza haundia da, ama edo aita izatea gauza ederra da. Aitaren rolak azken hamarkadetan izandako bilakaera ikusita argi dago gauzak aldatzen ari direla Baina, horrela al da benetan? Ziur gaude horretaz?». Horren guztiaren inguruan eztabaidatuko dute gaur, herritarrekin.