Hamazazpigarren Argazki Rallya antolatu du Hernaniko Argazki Forumak biharko. Arkupetan egin beharko da izenematea, 09:00etatik 10:00etara, eta 14:00ak arteko epea egongo da argazkiak egiteko.
Bi kategoria
Izena ematean, parte-hartzaileek kontrolerako argazki bat eta autoerretratu bat egin beharko dituzte, eta 10 euro ordaindu; 16 urtetik beherakoentzat doan izango da. Rioja tabernan hamaiketakoa izango dute denek prezioaren barruan.
Argazkiak Hernanin egin beharko dituzte, eta aurkezteko epea urriaren 10ean bukatuko da: gai bakoitzeko bat eta kontroleko argazkia eta autoerretratua bidali beharko dira, izenematean egokitutako zenbakiarekin, hernani.rally@gmail.com helbidera. Erakusketarako zein argazki aukeratzen den ere zehaztu behar da.
Helduen mailan 4 sari emango dira: bilduma onena, bigarren bilduma onena, hernaniar baten bilduma onena eta rallyko argazki onena. Umeenean, 3: bilduma onena, argazki bitxiena eta argazki atseginena.
Parte hartzaile bakoitzak aukera dauka dagokion mailan eta horrez gain, mugikorren kategorian parte hartzeko.