Hernanik Aparejadores Burgosen aurka jokatuko du gaur, 17:00etan, Landaren. Hernaniarrek pasa den astean Villajoyosan irabazi zuten, baina etxean ez dute garaipena ezagutzen eta hori dute helburu nagusi Polidorik zuzentzen duen taldeak.
Burgos aurten igo da lehenengo aldiz Ohorezko Mailara eta nahiz eta talde berrian izan gorengo mailan hamabosteko sendoa du. Fitxaketa mordoa egin dituzte azken urteetan, hasieran igoera lortzeko asmoz, eta behin lortu eta gero helburuak haundiak mantentzen ditu. Lehendabiziko hiru partiduetan bi irabazi ditu eta play off-eko postuetan dago.
Hala ere, Hernani etxean beti da talde sendoa eta kanpotarren garaipena ez da inoiz erraza izaten. Aurreko asteko garaipenari segida eman nahi diote trikoloreek, nahiz eta baja garrantzitsu batzuk dituen.
Aste honetan bertan Ander Gutierrez lesionatu da, kolpe baten ondorioz, eta bi hilabete egongo da geldirik.