«El Taller Kultur Lantegia Salagra, S.L. eta Kirol eta Kultura Aisian, S.L. EAJko hezkuntza zinegotziaren gertuko familiaren enpresak dira. Bi enpresa hauek kultur arloko ikastaroak eskaintzen dizkiote aspalditik Udalari. Kulturako gaiak Kultura zinegotziak jorratu beharko lituzke baina kasu honetan Hezkuntza zinegotziak bideratzen ditu» adierazi du Eh Bilduk ohar batean.
«Gutxienez aurreko legealdian baina 30.672 euro gehiago fakturatu du»
Nahiz enpresa hauekin harremana lehenagokoa izan, EH Bilduk «aldaketa bat nabaritu du EAJ gobernuan sartu denetik. Aurreko legealdian El Taller enpresak 53.674,66 euro fakturatu zizkion Udalari. Legealdi honetan bi enpresek, aldiz, 84.346,59 euro batu dituzte, hau da, 30.671,93 euro gehiago (%57,14 gehiago)».
EH Bilduk argi du «etikoki onargarria ez dela»
Legeak dio Kontratazio Organoak ezingo dituela zuzeneko senitartekoen enpresekin kontrataziorik egin. Astigarragako Udalaren kasuan, kontratatu nahi den zerbitzu edo obraren zenbatekoaren arabera, kontratatzeko ardura duen organo hori desberdina izan daiteke: Alkatea, kontratazio zinegotzi delegatua, Tokiko Gobernu Batzarra ala Udal Osoko Bilkura.
«Enpresa hauekin egiten diren kontratazioak zenbateko txikikoak (nahiz urtero bien artean 20.000 euro fakturaziora iritsi) dira eta kontratazio zinegotzi delegatuak onartzen ditu. Aipatu beharra da kontratu hauek guztiak zuzenean esleitzen direla, inolako publizitaterik gabe. Agian legalki ez dago ezer leporatzerik» baina EH Bilduk honen azterketa Udal-Idazkariaren esku utzi du.
Legala izan edo ez izan, EH Bilduk argi du «etikoa ez dela. Ez da bidezkoa botere-posizioa aprobetxatzea gobernuan dauden zinegotzien senitartekoen enpresen irabaziak puzteko. EH Bilduk uste du EAJk eta Alkateak batik bat, neurriak hartu behar dituztela gardentasuna eta lehia askea bermatzeko. Gutxienez, enpresa horiekin lan egiteari uztea».