Ostegunero Sandiusterri aurrean protesta egiteko asmoa azaldu dute Hernaniko Zaharren Egoitzako eguneko zentroko langileek. Eulen enpresako langileak dira, eta ELAk deitutako greba egunekin egin dute bat, Gipuzkoako Zaharren egoitzetako, eguneko zentroetako eta etxe tutelatuetako langileen eskariekin bat egiteko.
Denera, 17 greba egun zehaztu dituzte. Aurrenekoa irailaren 28an egin zuten, eta aste honetan beste hiru egiten ari dira: asteazkenean, atzo eta gaur. Hurrengo greba egunak azaroaren 26tik 30era, eta abenduaren 24tik 31ra egingo dituzte.
Lan-hitzarmena berritu gabe, 2016tik
Langileek azaldu dute «lan-hitzarmena 2016tik berritu gabe» dagoela. Hori horrela, eskaeretako bat «soldatak igotzea» da. Baina ez bakarra.
Aldarrikatu dute «gizartea zahartzen» ari dela, eta «adinekoek kalitatezko zaintza merezi» dutela. Horregatik, «langileen karga arintzeko ratioak egokitzea» eta «bizitza pertsonala eta lana kontziliatzeko neurriak» ere eskatu dituzte.
Feminizatutako sektorea
Beste sektore batzuetan gertatzen den bezala, adinekoen zaintzaz arduratzen dena ere, «sektore feminizatua» dela azaldu dute, eta honi lotuta, «baliokidea den sektore maskulinizatuarekiko soldata-tartea kentzeko» ere eskatu dute, hau «%30ekoa» delako.
Hau guztia aldarrikatu dute, «oraingo eta datozen emakume langileengatik, eta gure adinekoentzako kalitatezko zaintzaren alde».