Plenoa izango da gaur, ezohiko deialdian, Hernaniko udaletxeko Pleno Aretoan; eguerdiko 12:00etan izango da, eta puntu bakarra landuko dute, kiroldegiko igerilekuei buruzkoa, hain zuzen ere.
EAJ-PNV udal taldeak aurkeztu zuen ezohiko Plenoa deitzeko eskaera; eta alkateak deialdi hori egiteko 15 eguneko epea igaro zenez, deialdirik gabe, hortik 10 egunera automatikoki deituta geratu zen; gaurko, alegia.
Plenoak izango duen puntu bakarrean, eskatuko dute argitu ditzatela EAJk azaldutako 10 zalantzak, kiroldegiko igerilekuen inguruan.
Besteak beste, galdetu du nola konpondu den biomasaren galdararen kalkuluan proiektuak zeukan akatsa, eta dio bere ustetan jarri den galdarak ez dituela betetzen proiektuak aurreikusitako energia beharrak. Azaldu du, era berean, ez direla jarri xafla isolatzaileak, «RITEk derrigortzen dituenak igerileku klimatizatuetan». Galdetu du, baita ere, legala ote den diru publikoa gastatzea, «erortzeko arriskurik edo osasun txarrik ez zuen igerileku bat bota, eta toki gehiago eduki bai, baina aforo txikiagoarentzat prestatuta dagoen makineria daukan beste bat egiteko». Edota zergatik ez den aldatu aurreko galdaren tximiniaren txapa errea, eta zer dela eta darien ura, sartzeko eskailera berriei.