Igande honetan egingo dute, beste behin, Argazki Digitalen Rallya. 17garrenez antolatu du Hernaniko Argazki Forumak, eta udaletxeko arkupeetan jarri du zita, goizeko 09:00etan. Orduan zabalduko da izenematea, eta 10:00etara arte apuntatu daiteke, 10 euroan; 16 urtetik beherakoek, doan.
Izena eman eta berehala hasi daitezke lehiaketarako argazkiak ateratzen, eguerdiko 14:00ak arte. Hamaiketakoa ere egingo dute Rioja tabernan. Argazkien gaiak, Rallyaren hasieran jakinaraziko dituzte, baina argazki guztiak Hernanin atera beharko dira.
Sari banaketa, urriaren 26an
Partehartzaile bakoitzak, email bidez bidali beharko ditu argazkiak, gai bakoitzeko bana, hernani.rally@gmail.com helbidera. Urriaren 10a izango da azkeneko eguna. Argazki Forumeko hiru partaidek osatuko dute epaimahaia, eta sari potoloak izango dira, zortzi guztira. Urriaren 26an banatuko dituzte, 19:00etan Biterin.