Proba garrantzitsua zeukaten asteburuan, Sevillan, Hernaniko ipar martxako espezialistek. Espainiako Kopa zegoen jokoan, hirugarren eta azkeneko proba baitzen, lehiatuko zutena; Burgelun izan zen aurrenekoa, apirilean; eta Elchen bigarrena, ekainean. Eta sekulako emaitzekin bueltatu dira hernaniarrak, Sevillatik.
Denboraldi ona borobildu zuten Mari Jose Villalbak eta Agustin Urretabizkaiak, eta bigarren eta hirugarren bukatu dute Espainiako Kopa, hurrenez hurren, maila absolutuan. Gainera, biak izan dira txapeldun, beterano B kategorian.
Beste bi hernaniar ere aritu dira txapelketa lehiatzen, eta podiumera igo dira haiek ere, beterano C kategorian: txapeldun izan da Visi Madina, eta bigarren bukatu du Jose Luis Madinak.
Espainiako Txapelketa Mallorcan, asteburuan
Espainiako Kopa bukatuta, gertu dute hurrengo helburua ere. Izan ere, asteburu honetan bertan jokatuko da Espainiako Txapelketa. Mallorcan izango da, egun bakarreko proban, eta bertan izango dira hernaniarrak ere, espezialista onenen artean, berriro ohorezko postu horietan sailkatzeko ilusioarekin.