Hitzaren inguruko jaialdia da Hitz-andana, eta asteazkenean hasiko da, hiru emanaldirekin. Tramankuluak kontaketa antzeztua egingo da aurrena, 17:30etan Biterin, sei urtetik gorakoentzat. Ados teatroak, berriz, Xuxurlariak kale antzerkia egingo du Plazan, 18:30etan. Eta 20:00etan Oxido mikro antzerkia antzeztuko du Pez Limbok Urumea ikastolako eraikin zaharrean, gaztelaniaz, 16 urtetik gorakoentzat.
Ostegunean, bestalde, Ene maite kuttun guztiak, poesia eta musika emanaldia izango da Biterin, 20:00etan, Anne Sexton antologia liburuan oinarrituta, Ainara Gurrutxaga aktorearekin, Iban Urizar musikariarekin eta Harkaitz Cano idazlearekin.
Bukatzeko, urriaren 11n Kuba, Argentina eta Euskal Herriko inprobisatzaileen emanaldia izango da, 20:00etan Biterin. Maialen Lujanbio eta Julio Soto bertsolariek, eta Tomasita Quiala kubatarrak eta Araceli Argüello argentinarrak hartuko dute parte. Sarrerak, Biterin, 7,5 euroan salduko dira.