Martxan jarri da, hirugarrenez Hernanin, Beldur Barik programa, Udalak, Berdintasun Kontseiluak, Arremanitzek, Gaztelekuak eta herriko hainbat eragile feministek bultzatuta. Horrela, ikus-entzunezkoen lehiaketa orokorraz gain, Hernanin ere sariak banatuko dira.
Indarkeria sexista prebenitzeko
Beldur Barik EAEko instituzioek bultzatutako programa da, indarkeria sexista prebenitzeko. Beldur Barik jarrera bultzatu nahi da gazteen artean, hainbat bide erabilita.
Horietako bat da ikus-entzunezkoen lehiaketa. Neska eta mutilek desberdintasun egoeren aurrean nola erantzuten duten erakutsi behar da lan horietan. Aurtengo lehiaketan parte hartzeko epea irekita dago azaroaren 9ra arte, eta oinarriak ikusi eta lanak aurkezteko beldurbarik.eus webgunera jo behar da; 12-17 urte arteko eta 18-26 urte arteko kategorietan hartu daiteke parte (adin txikikoek baimena behar dute izena emateko).
Hernanin, beste sariketa bat
Lehiaketa orokor horretako sariak azaroaren 24an banatuko dira, eta bertara joateko autobusa jarriko da doan, Hernanitik (izena webgunean).
Baina Hernanin ere beste sari bat banatuko da kategoria bakoitzean, 150 eurokoa. Sari banaketa hori azaroaren 23an egingo da, 18:30etan Biterin.
Horrez gain, urriaren 27an topaketa egingo da, 10:00etan Biterin. Izaro Auzmendik eta Ibai Fresnedok tailer bana emango dute. Autodefentsa feminista, sexualitate parekidea eta ligoteo eta pornografia landuko dira.