Azaroaren 23an hasi eta Euskeraren Egunera arte, abenduaren 3ra arte, Euskaraldiaren 11 egun euskaraz egitasmoa burutuko dute Euskal Herriko makina bat herritan. Goizuetan eta Aranon ere sortu dute hori antolatzeko batzordea, eta izena emateko zabalik daukate dagoeneko, Euskaraldian aritu nahi duten goizuetar eta aranoarrek. Internet bidez egin daiteke, izenematea.euskaraldia.eus web orrian. Horretarako, aukeratu behar dute Ahobizi edo Belarriprest izanen ote diren, eta formularioa bete.
Aranoarrek, gainera, aurreratu dute postua jarriko dutela herrian, urriaren 19 iluntzean eta 21 eguerdian, izenematea errazagoa egiteko.
Euskera gehiago erabiltzeko ariketa, proposamena
Euskaraldiaren egitasmoarekin, «hizkuntza ohiturak astindu eta ohiko harremanetan euskera gehiago erabiltzeko ariketa bat» proposatu nahi izan dute. Horrela, bi roletako bat hartu behar dute. Ahobizi direnek, euskeraz ulertzen duenari hala eginen diote, berak erderaz erantzun arren; eta ezezagunei, euskeraz eginen diete aurreneko hitza. Belarriprest direnek, aldiz, euskeraz egiteko eskatuko diete euskeraz dakitenei, ulertuko dietelako, nahiz eta gero erderaz erantzun.
16 urtetik gorako herritarrek eman dezakete izena, eta behin apuntatuta, herrian jasoko dute materiala; tartean, egitasmoak iraun bitartean soinean eramanen duten Ahobizi edo Belarriprest ikurra.
Egitasmoarekin lortu nahi dute, «frogatzea uste baino gehiagotan dela posible euskerazko komunikazioa; jabetzea uste baino gehiago dela euskera ulertzen duen jendea; eta hizkuntza ohiturak aldatzea erosoagoa egitea», diote.