Atzo jaso zuten Lizeaga auzoko haurrek, marrazki lehiaketarako materiala. Eta gaur eta bihar, behintzat, koloretsu marraztuko dute auzoa, festekin gozatzeko 48 ordu baitauzkate aurretik, Lizeagan.
Hain justu, haur eta gaztetxoek denetik izango dute gaur, goiz eta arratsalde. Jolaserako gogoz hasiko dute eguna, baina ahaztu gabe marrazkiak bukatu behar dituztela! Izan ere, 11:30etara arte daukate entregatzeko. Eta behin lanak bukatuta, ondo merezitako hamaiketakoa ere egingo dute. Gero, elkarrekin aterako dira buruhaundiak eta Gautxori txaranga, kaleak alaitzera.
Eguerdian, berriz, mahaiaren bueltan elkartuko dira auzotarrak. Jendetza biltzen da urtero, jaien larunbateko herri bazkarian, eta aurten ez da gutxiago izango. 14:30etan jarri dute zita, eta txartelak auzoko bost tabernatan daude salgai, 12 euroan: Aitan-Etxe, Bodega Riojana, Pacheco, Lizarra eta Lizeaga. Eta bost horietan daude salgai, baita ere, gaur gaueko koadrilen afarirako tiketak, 8 euroan horiek. Dena den, afarirako posible da norberak bere afaria eramatea ere.
Herri bazkariaren ondoren, doan izango dituzte barrakak haurrek, eta bingoan ariko dira denak gero.
Afariaren aurretik, hala ere, ondo pasatzeko aitzakiarik ez dute faltako: haurrek doan izango dituzte barrakak, bingoan ere ariko dira gero denak, eta musika karroza aterako dute kalera, azkenik. Musikarik ez da faltako afalostean ere, eta pokerrean dakitenek, Pacheco tabernan daukate zita gauean, txapelketa jokatzeko.
Tortilla lehiaketa eta sagardo dastaketa, bihar
Omenaldi batekin hasiko dute biharko eguna, Sandiusterrin adinekoei egingo dietena. Eta ondoren, festetan ezaguna den plan batekin borobilduko dute goiza: tortilla lehiaketa egingo dute aurrena, eta sagardo dastaketa gero, trikitilarien erritmora. Toka eta bote txapelketak ere jokatuko dituzte eguerdi partean.
Arratsaldea, berriz, lasaiago hartuko dute, jaiei bukaera emateko. Mus txapelketa jokatuko dute Lizeaga tabernan, arratsaldeko 16:00etan. Iluntzeko 20:00ak direnean emango diete bukaera jaiei. Ordura arte, aprobetxatzea onena!
LIZEAGAKO JAIAK
GAUR, larunbata
10:00, Umeentzako jolasak.
11:30, Lehiaketarako marrazkien bilketa, eta umeentzako hamaiketakoa.
12:00, Buruhaundiak eta Gautxori txaranga.
14:30, Herri bazkaria.
16:00, Barrakak umeentzat dohainik.
17:30, Bingoa.
19:00, Musika karroza.
21:00, Koadrilen afaria.
22:30, Musika DJen eskutik.
23:00, Poker txapelketa, Pacheco tabernan.
BIHAR, igandea
10:30, Omenaldia adinekoei, Sandiusterrin.
11:30, Tortillak emateko ordu-muga, lehiaketan parte hartzeko.
12:30, Sagardo dastaketa eta trikitixa.
12:30, Toka eta bote txapelketak.
16:00, Mus txapelketa, Lizeaga tabernan.
20:00, Jaien bukaera.