Hernanitik Astigarragara mugituko dira, oraingo honetan, Elkarbizi taldeko kideak, eta bertan eskainiko dute urriko hitzaldi-ikastaroa. ETAren xantaia ekonomikoaren azpiko bizitza esperientziak izango dituzte aztergai urriaren 3an, hau da, datorren asteazkenean.
Arratsaldeko 19:00etan hasita izango da hori, kultur etxeko areto nagusian.
Saioa irekia da, baina izena eman behar da datorren asteartea, urriaren 2a baino lehen: ganboiturri@gmail.com helbidean.
Barandiaran eta Lazpiur, hizlari
Elkarbizik azaldutakoaren arabera, helburua da «zerga iraultzailearen xantaiaren azpian bizi izan zirenen drama ikusaraztea. Biktimak izan direnengan -eta beraien senide eta lagunengan- sortutako kalte eta izua ezagutzera ematea». Izan ere, Deustuko Unibertsitatearen ikerketa baten arabera, «jasotako mehatxua beren pribatutasunean mantendu zuten».
Gaiaren inguruan hitz egiteko, beren esperientzia kontatuko dute Juanma Barandiaran Etxeberriak, Goierriko Goieki Agentziaren zuzendaria izan zenak, eta Migel Lazpiur Lamarianok, Confebask enpresarien elkarteko lehendakaria izan zenak.