Bisitari berezia izan zuten aranoarrek abuztuaren hasieran; Joe Radice australiarra izan zuten bertan, udara pasatzen. Eta hori aprobetxatuz, defentsa pertsonaleko saioa eskaini zuen Maisuenean. Karateko preparatzailea eta txapelduna da bera; egun Dubaien prestatzaile pertsonala da.
Aranoarrek deialdia «arrakastatsua» izan zela azaldu dute: 30 bat lagun elkartu ziren, 10 urteko haurrekin hasi eta herriko helduenak arte, izan emakume zein gizon.
Bertan, teknika desberdinak ikasi ahal izan zituzten aranoarrek «basikoak, edozeinek egin ditzakeenak, nahiz eta fisikoki oso gogorra ez izan. Denbora irabazteko eta alde egiteko aukera eskaintzen dutenak». Besteak beste, heltzeko teknika, itotze-teknika, erasorako teknika...
Joe Radicek ikastaroan azaldutakoaren arabera, «defentsa pertsonala ez da borroka egiteko, zure burua defendatzeko, baizik».
Saioa bukatzerakoan, Joe Radicek eskerrak eman zizkion herriari, Ainhoa Ansa alkateari, Begoña Leoneti itzultzaile lanak egiteagatik, eta partaide guztiei, aukera hori emateagatik. Barkamena ere eskatu zuen baten batek golpe txarren bat jaso bazuen, bere aldetik.