Tabernetako terrazen eta zaraten ordenantza aldatu nahi duela azaldu du Udal gobernuak, eta horren inguruko eztabaida zabaltzeko aukera herritarrei luzatu nahi diela dio EH Bilduk. Gai hori lantzeko, hain zuzen, batzar irekia deitu du biharko; arratsaldeko 19:00etan izango da, udaletxeko areto nagusian.
«Egoeraren argazki errealago bat» jasotzea, helburu
Arautegi berrian «herritarrak txertatzea beharrezkoa dela» uste du Astigarragako EH Bilduk, izan ere, «taberna eta jatetxeak eta euren terrazak herriko elkargune inportantea izan ohi dira, baina egia da batzuetan ere, arazo-iturri izan daitezkeela».
Hortaz, EH Bilduk batzarra egingo du «egoeraren argazki errealago bat jaso eta ordenantzak guztien interesei ahalik eta hobekien» erantzutea.
Horregatik guztiagatik, tabernariekin aurrerago beste hitzordu bat ere jarriko dute.
Nabarmendu dute EH Bilduk ez duela konpartitzen «EAJren estiloa: interesdunei (izan tabernari, bezero edo bizilagun) ezer galdetu gabe, euren ikuspuntu bakar eta itxia inposatuz». Hortaz, «Udal Gobernuan dagoen alderdiari dagokion arren, EH Bilduk, beste behin, herritarren iritzia jasotzeko lekukoa hartuko du».