HERNANIKO Udalak ikasturte hasierako udazkeneko kultur egitaraua aurkeztu berri du eta ekitaldietako bat ostegunean izango da: Lasala Dantza Konpainiaren Microclimate, disziplina desberdinak nahasten dituen dantza emanaldia. Biterin izango da 20:00etan, eta sarrerak salgai daude 7,5 euroan.
Bertan, Judith Argomanizen zuzendaritzapean, zazpi dantzari izango dira oholtzan, bakoitzaren barruan dauden munduak ikusarazten: «gure mundua, nire mundua, garbia, ederra, bakarra. Pertsona bakoitza errealitate arrunt batean bizi da eta, aldi berean, patroi eta prozesu atmosferiko pertsonalak bereizgarriak egiten dituzten mikro mundu txikietan».
Pello Añorgarekin ipuin kontaketa, bihar, eta Lupe Lekuonarekin urriaren 30ean
Hala ere, Microclimate ez da izango asteko lehenengo zita. Bihar, Pello Añorga ipuin kontalaria egongo da Biterin. 17:30etan 3-4 urte bitarteko haurrentzat irakurriko du ipuina, eta 18:00etan 5-7 urte bitartekoak hartuko ditu.
Bestetik, liburutegitik jakinarazi dute Lupe Lekuonaren ipuin kontaketa urriaren 30ean izango dela, eta ez urriaren 28an, egitarauan agertzen den bezala.
‘Cantores y cantoras’, berriz ere ostiralean
Zelanda Antzerki taldeak eta Goiz Eguzki eta Ozenki abesbatzek pasa den astean emandako Cantores y cantoras ikuskizunak, bestalde, arrakasta izan du, eta errepikatu egingo dute ostiralean, 19:30etan, Biterin. Gonbidapenak Biterin lortu daitezke dagoeneko.