Orain Hernanik prentsa oharra argitaratu du. Bertan Hernaniko aire kutsadura maila altua eta horren inguruan aurkeztuko duen mozioa ezagutarazi ditu. «Duela asko, Hernaniko udaletxean enpresa bat kontratatu zen partehartze prozesu bat aurrera eramateko Noa guaz? izenburuarekin. Prozesu honen funtsa parte hartzen zuten hernaniarrek 10 urtetan herria nola imajinatzen duten pentsatzea zen, honela herri ideal horretara iristeko zer aldatu beharko litzateken aztertuko zuten».
OHk uste du herri hobea izateko egunero joan behar dela gauzak egiten, «iraganarekin amesten baina orainaldia kontuan hartzen. Eta Hernanin errealitatea da usaintasun kutsadura indize altua dagoela. Orain dela urtebete Hernaniko Udaletxeko Ingurugiroko zinegotziak agindutako ikerketaren arabera, Hernaniko aireak kutsadura indize altua jasaten du, usainari dagokionez».
«Ikerketak izandako emaitzak analisien eraginpean jarri beharko lirateke, beharrezkoak diren interbenzioak egiteko. Analisi hori ez zen egin» dio Orain Hernanik.
Airearen kalitatearen konpetentzia osoa Eusko Jaurlaritzak du OHren arabera, «baina Udala da herritarren osasun eta ongizatearen ardura duena. Horregatik gure galderak dira: Gobernu taldeak ez al du Hernaniko airea jasaten? Zergatik ez zaio lehenbailehen arazo honi aurre egiten aurrera joan baino lehen? Zergatik ez zaie Eusko Jaurlaritzari eta produktu toxikoak ekoizten dituzten enpresei eskatzen behar diren neurriak hartzea honekin bukatzeko edo gutxienez, gutxitzeko?»
OHk Gobernu Taldearen hitzak gogorazten ditu. «Hernanik gaizki usaintzea ez du osasunarentzat kaltegarria dela esan nahi. Baliteke arrazoi izatea, baina ez dakigu ziurtasun osoz, ikerketak eman zituen emaitzak aztertzen ez diren bitartean».
Horregatik, Orain Hernanik asteartean izango den udalbatzan mozioa aurkeztuko du. «Gure osasunak kezkatzen gaitu, hernaniar guztionak ere bai, guretzat nahi ez duguna ez dugu inorrentzat nahi. Amaitzeko, 10 urte barru kutsadura gabeko Hernani imajinatuko dugu. Bide luzea dago aurretik, baina orain lanean hasi gaitezke. Horrexegatik lau puntuko mozioa aurkeztuko du usaintasun kutsaduraren inguruan ikerketa, emaitzak eta soluzio bidea jartzeko.