Mugikortasun Jasangarriaren Astea ospatzen da Europa osoan egun hauetan, eta baita Hernanin ere. Horrela, modu osasuntsuan eta ingurugiroa zainduz mugitzeko moduak sustatzea da helburua, eta baita ere kontzientziazioa bultzatzea, edozein tokitara iristeko bide eta moduak herritar guztientzako irisgarriak izan daitezen.
Atzo, Kemenek, Hernadesek, AGIk, AGAEBek eta Koxka elkarteak antolatutako kirol egokituaren ginkana egin zen, eta gaur eta bihar, patinetan, bizikletan edo oinez ibiltzen direnek izango dute lehentasuna, kotxeen aurretik.
Patinak eta Ipar Martxa
Gaurkoan, oinez edo patinetan ibiltzen direnek hartuko dute protagonismoa.
Goizeko 10:00etan, Plaza Berrin elkartu eta patinetan ibilbide bat egiteko aukera izango da.
Era berean, 10:30etan, Ipar Martxa egiteko oinarrizko ikastaroa emango da, martxan abiatu aurretik. Atsegindegin egingo da, eta euria egiten badu, kiroldegian.
Gero, 11:30etan, Patin Festa egingo da Urbieta kalean, eta 12:15etan patinatzaile trebatuak eta txapeldunak ibiliko dira beren abileziak erakusten. Hamaiketakoa izango dute gero, partehartzaileek.
Bizikletak, bihar
Bizikletek hartuko dute bihar protagonismoa. Goizeko 09:30etatik 12:00etara, bizikleta ibilaldia egin ahal izango da Atsegindegitik aterata, eta bertan geratu nahi dutenek bide heziketa zirkuitoa izango dute aukeran.
Zinkoenean, berriz, ibilgailu hibrido eta elektrikoen erakusketa jarriko da, eta horietako batzuk probatzeko aukera ere emango da.