ikasturte hasierarekin batera, dagoeneko etxe guztietara iritsi da urteko bigarren erdiko udazkeneko kultur egitaraua. Honen nondik norakoak azaldu eta egitarau berria aurkezteko, prentsaurrekoa eskaini zuten herenegun Koro Etxeberria kultura zinegotziak, Agurtzane Aizpuru kultura teknikariak eta Rakel Gonzalez liburutegiko arduradunak.
Bost disziplina
Koro Etxeberriak azaldu zuenaren arabera, aurtengo agenda aldatu egin dute: «lehen, modu kronologikoan eskain–tzen ziren jarduerak; orain, disziplinaka ordenatu dira». Udalaren ustez, «modu logikoagoa, koherenteagoa» delako.
Bost disziplinatan banatu dituzte kultur ekintza guztiak: literatura, musika, nahastekak, antzerkia eta arte plastikoak. Horietan artean, literaturaren arloa nabarmendu nahi izan zuen Etxeberrian, bertan «urrats berezia» eman nahi delako udazken honetan.
‘Hitz-andana’, jardunaldi berria
Hain zuzen, literatura arloan izango direnen inguruan aritu zen Rakel Gonzalez liburutegiko arduraduna. «Alde batetik, ohikoak eta errotuak dauden ekintzak izango dira, ipuin kontaketak eta literatura solasaldiak; eta bestetik, bi jarduera berri: Hitz-Andana jardunaldia eta irakurketa partekatuak», azaldu zuen.
Hitz-Andana jardunaldia urriaren 3, 4 eta 11n izango da, eta Gonzalezek onartu zuenez, «Hernani Hitzetan jardunaldiaren hutsunea betetzera dator». Hau da, hitza izango da protagonista, aurrekoan bezalaxe: «hitza kontatua, xuxurlatua, antzeztua, errezitatua...».
Berrikuntza gisa, baita ere, Hitz-Andana jardunaldian eskainiko den Pez Limbo mikro antzerkia Urumea ikastolako eraikin zaharrean egingo dute.
Bigarren jarduera berria Irakurketa Partekatuarena izango da: «herriko pertsona ezagunek irakurle gisa daukaten esperientzia partekatuko dute». Aurreneko gonbidatua Kattalin Miner izango da, urriaren 24ean.
Herriko taldeak, protagonista
Musika arloa ere garrantzitsua izango da, udazken honetan. Mikel Urdangarinen kontzertua izan zen seihileko berriaren aurrenekoa, eta beste hiru ere izango dira, Biterin: urriaren 18an, Niko Etxart eta Maialen Errotabere; urriaren 13an, Alboka; eta abenduaren 29an, Bloody Brotherhood, Meltdown eta Liher.
Azken hau izango da berrikuntza: «rockarekin bagenuen zor bat». Gainera, aprobetxatuko da Hernaniko lokaletan entsaiatzen duten taldeak badaudela, horietako bi dira Bloody Brotherhood eta Meltdown.
Disziplina desberdinak, adin ezberdinentzat
Ohi bezala, arte eszenikoen arloa ere presente egongo da udazkeneko egitarauan. Batetik, urteko bigarren antzerki zikloa izango da azaroaren 13tik 15era, hiru antzerkirekin: Argien hautsa (Vaiven teatroa, estreinaldia), Izoztutako haizea bezala (Tanttaka teatroa), eta Herederos del Ocaso (Club Canibal, Madril), hurrenez hurren.
Horrez gain, Nahastekak atalean ere, beste bi ikuskizun ere izango dira. Aurrenekoa, datorren ostegunean: Microclimate (sarrerak salgai daude, dagoeneko).
Eta azkenik, haurren antzerkian saiakera berezia egin dela azaldu zuen Aizpuruk: «batetik, ahalik eta adin-tarte ezberdinenak kontuan hartzeko; eta bestetik, disziplina desberdinak izan daitezen».
Arte plastikoek ere, txokoa
Udazken honetan ere, txoko berezia izango dute arte plastikoek, hainbat artistak jarriko dute erakusketa, Biterin.