Ricardo Crespo, gaur egun, PSE-EE alderdiaren bozeramailea eta zinegotzia da, Hernaniko Udalean, eta pasa den astean alderdi sozialistaren herriko primariotarako hautagaitza aurkeztu zuen. Bertan erabakiko da nor izango den datorren udaberriko udal hauteskundeetan alderdi sozialistaren alkatetzarako hautagaia. Cresporen hitzetan: «proiektu bat aurkeztuko dut eta bertan Hernani, eskualdean hazkunderako gaitasun gehien duen herria bezala finkatu nahi dut».
Ricardo Crespok 34 urte ditu, Zientzia Politikoetan lizentziatua da EHUren eskutik eta euskalduna da. Bere ustez «Hernani 20.000 biztanleko udalerria bihurtu da Donostiarekiko duen gertutasunagatik hein haundi batean. Urrutiago egon bagina desberdina izango zen, baina 15 kilometroko erradio batean egoteak abantaila ematen dio herriari».
Cresporen esanetan hazkunde demografiko hori «aukera bat da Hernanirentzat dirusarrera gehiago ekartzen dituelako eta horrek beharrezko zerbitzuetan inbertsioak egitea bideratuko du». Horretarako, azpimarratu du Gipuzkoako Foru Aldundiarekin elkarlana, «eta batez ere Mugikortasun alorrean Marisol Garmendia sozialista egiten ari den lana».
Gaur hasiko da bermeak jasotzeko prozesua eta urriaren 5era arte luzatuko da 20.000 biztanle dituzten herrietan
«Nortasuna mantendu eta herria erakargarri egin»
Cresporen iritziz, «komunikazio onak, azkarrak eta erosoak daude, gainera Lurraldebuseko autobusen maiztasun egokiarekin. Horrek suposatu du, Hernani izatea Donostiako etxebizitzen prezio altuetatik ihesi dabiltzan familien aukera».
Honela, «Hernani ezin da bihurtu lo-hiria eta horretarako hiritarrei kalitatezko zerbitzuak eskaini behar zaizkie garbitasunean esaterako, txotx garaiak sortzen dituen arazoak konpondu behar dira edo azpiegitura hobeak eskaini behar dira bidesarean Hernanitik irteera bat adibidez Florida gunean. Baina ezin dugu ezta zerbitzuen herri batera mugatu, industri inbertsioentzako erakargarria diren politikak mantendu behar dira kalitatezko lanak sortuko dituztenak». Horiek izango dira Cresporen erreibindikazioak alkatetzarako hautagai izateko aukeratua baldin bada. «Gakoa zerbitzuak eskaintzea da etxebizitza eta bizi proiektu bat aukeratzean Hernaniren alde egiteko».
Jende berria erakartzeak herria gaztetzea ere dakar eta horrek udalerri bezela etorkizuna izatea esan nahi du Cresporen aburuz. «Hala ere nahiz eta 20.000 biztanlera iristea positiboa den, hiriago egiten gaitu nolabait esateko, oso beharrezkoa dena da; herri izaera mantentzea gure ohiturekin eta gure nortasunarekin, esentzia baztertu gabe».
Primarioen prozesua
Gaur hasiko da PSE-EEn bermeak jasotzeko prozesua, urriaren 5a arte. 20.000 biztanle baino gehiagoko herrietan alkatetzarako hautagaitzarako afiliatuen portzentai minimo baten bermeak bildu behar dira.
«PSOEk martxan jarri duen tresna da, alderdia garai berrietara eta herritarren partehartzearen beharretara egokituz».