Erabaki Hernani Decide 2019 prozesua azken fasean murgildu da. Proposamenak bozkatzeko epea ireki da eta azaroaren 11n amaituko da bozketa garaia. Astelehenean aurkeztu zituzten Luis Intxauspe alkateak, Esti Aldeiturriaga zinegotziak eta Aztikerreko Maitane Barrenetxea teknikariak. Alkateak azpimarratu zuen prozesuaren sendotzea: gero eta jende gehiagok ezagutzen du eta herritarrak dira motorra».
Bi aldaketa nagusi: Gaika multzokatu dira eta 12 urtetik gorakoek bozkatu dezakete
Multzokatu egin dira proposamenak gaien arabera, txiki eta haundiak konpentsatzeko. Honela 53 proposamen lehenetsi dira eta 30 proposamenetan bildu dira. Horietatik 10 aukeratu beharko ditu herritar bakoitzak, ez gehiago, ez gutxiago; bestela, boto baliogabetua izango baita.
Bestetik aurtengo aldaketa haundiena, Eskola Agenda 21 proiektuaren bidez partaidetza eta bozkatzeko adina jaistea izan da, 8 urtetik gorako herritarrek parte hartu ahal izango dute. Zergatik aldaketa hau? galdetu zuen Barrenetxea teknikariak. Bi arrazoi nagusi nabarmendu zituen. «Hasteko adin honetakoak ere herritarrak dira. Hernani bizi dute, herriko beharrak eta gabeziak identifikatzen dituzte, eta euren egunerokoan ere Hernani hobetzeko proposamenak dituzte».
Bestetik Eskola Agenda 21 proiektuarekin duen antzekotasunarengatik ere erabaki da beraiek bozkatzea. «Hausnarketa eta balorazio gaitasuna barneratzen dute, eta bozkatzeko gaitasuna badutela uste dugu».
Hernani Erabakik beste esperientziak izan ditu kontutan, Gipuzkoako Foru Aldundia, besteak beste. «Proiektu pilotu bat egin berri du haur eta nerabeekin proposamenak egin eta erabakitzeko».
8-12 bitartekoek klasean tutorearekin landuko dute
Hernaniko kasuan, bozkatuko duten lehenengo urtea da. 12 urtetik gorako ikasle guztiek edukiko dute bozkatzeko aukera. Adin honetatik beherakoekin ikastetxe bakoitzak erritmo eta lanketa ezberdinak izango ditu. Tutorearekin landuko dituzte klasean.
53 proposamenetik, 10 aukeratu webgunean edo postontzien bidez
Bosgarren urtea da prozesua aurrera eraman dela eta orain hernaniarrek dute aukera 53 proposamenetik 10 aukeratzeko. Guztira 376 proposamen aurkeztu ziren eta denak, baita bidean geratu direnak ere, erantzuna dute. Proposamenak kontsultatu daitezke webgunean eta zein momentutan geratu ziren kanpo eta zergatik irakurri eta ikusi daitezke.
Orain 53 geratzen dira, 30 proposamenetan bildu dira eta herritarren esku dago zertan inbertitu 500.000 euroak. Bozkatzeko bi bide izango dira: erabaki.hernani.eus webgunearen bidez, edo etxeetara bidalitako diptikoa bete eta udal eraikinetan jarri dituzten postontzietan sartuz. Aurtengo diptikoak osoagoak dira eta irudiak ikusi daitezke. NAN zenbakia edo baliokidea eta izen abizenak jarri behar dira bozkatzerakoan.
Etxean jasoko den eskuorria bete eta postontzietan bota behar da. Honako lekuetan aurkitu daitezke postontziak: Udaletxea, Biteri, Kiroldegia, Gaztelekua, Institutua, Goiz Eguzki, Sandiusterri, EPA eta auzo elkarteen egoitza-lokal guztietan.
Gaur Kaxkoan proposamenen inguruko informazioa eta xehetasunak
Proposamenak, gainera, auzoz auzo aurkeztuko dira. Aurreneko zita udaletxean izango da gaur, 19:00etan.
Guztira zortzi saio egingo dira: Gaur udaletxean, 19:00etan; bihar Zikuñagan, 19:30etan; etzi Latsunbe Berrin, 19:30etan; Portun urriaren 22an, 19:00etan; Sorgintxulon, urriaren 24an, 19:00etan; Karabelen, urriaren 25ean, 19:00etan; Florida Etxeberrin, azaroaren 7an, 19:00etan; eta Antziolan, azaroaren 8an, 19:00etan.
Aurten, kaleko presentzia indartze aldera, lau aste hauetan zehar stand bat jarriko da herriko gune ezberdinetan, herritarrak bozkatzera animatzeko.