«Ez dugu inoren kontra egin nahi; bakarrik nahi dugu lortu herritarrei pentsaraztea», zioen atzo Marta Zulaicak, Beterriko Merkataritza Bulegoko arduradunak. Eta herritarren hausnarketa hori pizteko, plastiko beltzak erabili dituzte: komertzioen erakusleihoetan jarri dituzte; joan den urtean Hernanin egin zutena, eskualdeko beste herrietan egin dute orain, hain justu. «Herri triste eta hilaren irudia eman nahi dugu; horrelakoa izango litzateke, komertzio txikirik gabeko herria», azaldu zuen Zulaicak. Andoainen aurkeztu zuten kanpaina, Urigain kultur etxean, eskualdeko udal ordezkari, merkatari eta teknikariek.
«Gogorra da zure dendako erakusleihoa beltzez estaltzea, baina egoera oso zaila da. Erakutsi nahi dugu herri biziak nahi ditugula. Herritarra libre da nonahi erosteko, baina erakutsi nahi dugu herrian bertan erostea ere aukera bat dela; eta askotan, ez okerrena, onena baizik», nabarmendu zuen Siadecoko Juanjo Allurrek.
Komertzioen %75a baino gehiago, bat eginda
Hortaz, Beterri eskualdeko merkataritzaren egoera «kezkagarriaz» ohartarazi nahi dituzte herritarrak, sentsibilizazio kanpaina honen bitartez. Hernanik, Astigarragak, Andoainek, Usurbilek eta Lasarte-Oriak egin dute bat; eta partehartze haundia izan du, merkatarien aldetik: «komertzio txikien %75ak baino gehiagok egin du bat», azaldu zuen Allurrek. Hernanin, 109 komertzio atera ziren kalera atzo, Hernaniko Merkataritza Festa ospatzeko; eta Astigarragan, 50 establezimenduk jarri dituzte plastiko beltzak, beraien erakusleihoetan.
Elkarlanean aritzearen ideia horrekin bat egin zuten kanpainaren aurkezpenera bertaratu zirenek: «txikiak gara, baina elkartzen bagara, indar haundia izan dezakegu. Oso garrantzitsua da bat egitea», adierazi zuen Maugi Rojok, Hernaniko Ikusi-Makusi dendakoak.
Tristuraren ondoren, alaitasuna eta bizia
Ostegunean hasi ziren dagoeneko, Astigarraga, Andoain eta Usurbilgo komertzioetako erakusleihoak plastiko beltzekin estaltzen; horrela egongo dira, bihar arte. Tristurak eta herri hilaren irudiak, ordea, alaitasunari eta herri biziari egingo dio bidea, asteartean. Irailaren 24tik aurrera, hiru herri horietan eta Lasarte-Orian, «dendak koloretako globoekin apainduko ditugu, eta kalera aterako gara, herriari poza eta bizitza ekartzeko», aurreratu zuten.
Alaitasun eta bizitasun hori bera da, Hernaniko komertzioek azaleratu zutena atzo, Merkataritza Festarekin. Egun osoko ospakizuna egin zuten, komertzio txikiak herriari aportatzen dion guztia aldarrikatzeko, eta Berriak elkartearen 25garren urteurrena ospatzeko.
«Komertzio txikiek ez dituzte babes hitzak behar; babes neurriak behar dituzte»
Merkataritzaren arazoak, erakundeen partehartzea ere eskatzen duela nabarmendu zuen Jon Zulueta Andoaingo zinegotziak: «ohituta daude gure babes hitzak entzuten, baina ez da hori behar dutena. Babes neurriak behar dituzte, Udaletatik hasi, Aldunditik segi eta Eusko Jaurlaritzaraino».
Udala eta komertzioen elkarlana nabarmendu zuen Luis Intxauspe Hernaniko alkateak ere, eta horretarako, adierazi zuen «merkatari elkarteek indarra hartzea» ezinbestekoa dela: «animatu daitezela komertzio gehiago, elkarteko bazkide izatera. Kanpaina hau bezalako ekintza txikiek, eragina dute herria biziberritzeko bide horretan», nabarmendu zuen.
Zorione Etxezarraga Astigarragako alkateak, bere aldetik, adierazi zuen «apustu serioa» egin dutela herriko merkataritza indartzeko, eta «sakontasunez» sartu nahi dutela erronka horretan. Nabarmendu zituen Astiko merkatari eta ostalari elkartearen biziberritzea, eta Udalean merkataritzaren arloko teknikari bat hartu izana.
Jaione Irazu teknikariak ere hartu zuen hitza, kanpainaren aurkezpenean: «ostegunean, poza ematen zuen kaletik ibili eta ikustea merkatari guztiak lanean, erakusleihoak beltzez estaltzen elkarrekin».