Gelditu gabe, 770 kilometroko ibilbidea mendiko bizikletarekin. Erronka polita eta abentura exijentea daukate aurretik, Jon Blanco eta Mikel Arriaga astigartarrek: Madrid-Lisboa Non Stop lasterketan ariko dira ostiraletik; eguerdiko 12:00etan Madriletik abiatu, eta Lisboara iritsi arte. «Horixe da berezitasun haundiena, gelditu gabe dela, erreleboka. 70-80 kilometroko etapa modukoak daude markatuta, eta horien bukaeran daude erreleboa emateko puntuak, herri batean», diote.
Banaka, binaka, hirunaka zein launaka hartu daiteke parte, eta bikotea osatuko dute astigartarrek: «Jon abiatuko da aurrena, eta hortik aurrera, bakoitzak etapa bat osatuko du. 10 etapa dira, beraz bakoitzak bost, ezer pasatzen ez bada behintzat», azaldu dute.
Izan ere, horrelako probaren bat egiten duten aurreneko aldia da: «berria da guretzat, baina ondo prestatuta eta ilusio haundiarekin goaz, eta oso konpetitiboak gara. Aurreko urteetako maila baldin badago, txukun ibiliko gara. 38 ordutan bukatzeari begira prestatu gara, eta joan den urtean, 38 ordu horietan sartu ziren podiumekoak... Aurrenekoa ondo pasatzea eta dena ondo joatea da, baina ez dugu ezer sinatzen...». Horretan, badirudi baikorragoa dela Blanco: «36 ordutan eginez gero, larunbateko gauerdia litzateke; nire apustua da larunbatean bukatuko dugula». Eta Arriagak erantzun: «ni konformatzen naiz igandean gosaltzera iristearekin!». Baina ados daude biak, proba gogorra izango dela: «erraz esaten da 36 edo 38 ordu, baina gero luze egin behar zaigu».
‘Tranpak’, ibilbidean
Hainbeste kilometrotan zehar, hamaika txoko eta zonalde ezberdinetan ibiliko dira astigartarrak, eta tranpak ere topatuko dituzte, antolakuntzaren azalpenetan agertuko ez diren sorpresak: «ibilbidearen deskribapenean, jartzen du ez dela gorabeheratsua, baina ikusi dugu zein abiaduratan ibili diren aurreko urteetan; eta ez dira oso batazbesteko altuak. Beraz, nekeaz aparte, aldapak ere badaude nonbait! Gainera, Portugalen, lurra hondar askorekin izaten da, martxa motelagoa da, eta gu ez gaude ohituta. Ea nola moldatzen garen», diote astigartarrek.
Beste zailtasun extra, ibilbidea ez dela markatuta egongo: «tracka emango digute, ibilbidea bera formatu digitalean, gure GPSan sartzeko eta jakiteko nondik joan behar dugun. Hori ere praktikatu behar izan dugu, azkenaldian. Gu beti ibili gara bide ezagunetatik edota bide berriak bilatzen, baina GPSekin eta horrelakoekin inoiz ez. Ea ez zaigun garesti ateratzen nobatada...!». Gainera, ezin dute ibilbidetik atera: «toki batzuetan, kontrol puntu sorpresak egongo dira, eta horietatik pasatzen ez bazara, penalizazioa daukazu».
«Atseden hartzea tokatzen zaigunean, ez dugu batere deskantsatuko»
GPSa bezala, gainean eraman beharko dituzte ura, janaria, erramintak... «Errelebo puntutik puntura ez baita ezer egongo».
Hala ere, izango dute laguntzarik, astigartarrek: «autokarabana bat alokatu dugu, eta bi laguntzaile etorriko dira gurekin. Beraiek gidatuko dute puntutik puntura. Guk, erreleboa bukatu eta bestea abiatzen denean, bizikleta garbitu eta zerbait jango dugu; eta ohean etzango gara pixka bat, hurrengo puntura mugitu bitartean. Baina ezagututa nolakoak garen gu biok, atseden hartzea tokatzen denean, ez dugu batere deskantsatuko. Hiru edo lau orduko tarteak izango dira, baina buruari bueltaka ibiliko gara, bestea zer moduz ote dabilen kezkatuta. Orain arteko esperientzia luzeena 24 ordukoa dugu, eta ez genuen batere lorik egin. Azken batean, ez zara desaktibatzen».
«Denbora generamakien horrelako probaren bat egiteko asmotan»
Nazioarteko proba da egingo dutena, gero eta indar gehiago hartzen ari dena: «pixkanaka zabaltzen ari dira horrelakoak. Donostia eta Bartzelonaren artean egiten zen bat, eta hori egitea zen gure asmoa, baina aurten bertan behera geratu da, eta hori ezin bagenuen egin... ba beste bat! Denbora generamakien horrelako bat egiteko asmotan, eta aurten animatu gara». Ez dute azkena izango, ziurrenik; dagoeneko ari dira pentsatzen, datorren urtean Pirinioak zeharkatzen dituen beste proba bat egingo ote duten... Eta Alpeak ere aipatu dituzte!
Oraingoz, ostiralekoa dute buruan, «sentsazio onekin» hasiko dutena, denboraldi bikaina borobiltzeko asmotan: «urte polita daramakigu, helburu guztiak beteta».