Mugikortasun Jasangarriaren Europako Astea da hau, eta Astigarragan ere izango da ekintzarik. Gaur bertan hasiko dira, tren berdean ibilbidea egiteko aukera egongo baita, arratsaldean: Joseba Barandiaran plazatik abiatuko da trena, 17:00etan aurreneko txandan, eta 18:00etan bigarrenean.
Bihar, berriz, zita bikoitza izango da: helduentzako gimnasia saio irekia Joseba Barandiaran plazan, 11:00etatik 12:00etara; eta Why we cycle pelikularen proiekzioa arratsaldeko 19:00etan, kultur etxean. Pelikula horretan, Holandako txirrindularitza kulturari buruz ariko dira, aditzera emanez bizikletan ibiltzeak zoriontasunera eramaten duela.
Bikoitza izango da zita, ostiralean ere. Goizean, ibilaldia egingo dute, Joseba Barandiaran plazatik Martutenera, Astigarragako udaletxean luntxarekin bukatzeko. Eta arratsaldean, ginkana eta txokolatada Herri Eskolako patioan.
Inkesta, etxez etxe
Bestalde, Udalak jakinarazi du, Mugikortasun Astea aprobetxatuz inkesta utzi duela buzoietan, etxez etxe, garraio publikoaren inguruan herritarren asebetetze maila ezagutzeko. Inkesta bete ondoren, udaletxean, kiroldegian edota kultur etxean dauden kutxetan utzi behar da, edo emailez bidali: alkatetza@astigarraga.eus.
MUGIKORTASUN ASTEA
GAUR, asteazkena
17:00 eta 18:00, Tren berdea, Joseba Barandiaran plazatik aterata.
BIHAR, osteguna
11:00-12:00, Helduentzako gimnasia, Joseba Barandiaran plazan.
19:00, Why we cycle pelikularen proiekzioa, kultur etxean.
ETZI, ostirala
11:00, Ibilaldia, Joseba Barandiaran plazatik Martutenera, bidegorrian barrena. Ondoren pikoteoa, udaletxean.
17:00, Ginkana eta txokolatea bizkotxoekin, Herri Eskolako patioan.